დამწყები მეწარმეებისთვის ახალი ბიზნეს პლატფორმა იწყება

2018-10-01 09:13:01, 2022 ნახვა

ეკონომიკა

თბილისი მეწარმეობის ფესტივალ „მეწარმეთა სივრცე - 2018“-ს უმასპინძლებს. პროექტი „საქართველოში ახალგაზრდების სამეწარმეო უნარ-შესაძლებლობების, დასაქმებისა და შემოსავლის გენერირების მხარდაჭერის პროგრამის’’ (YES-Georgia) ორგანიზებით ტარდება და მისი მიზანია ხელი შეუწყოს ახალგაზრდა მეწარმეთა პროფესიულ ზრდას, საქმიანი ურთიერთობების გაღრმავებას და საკუთარი ბიზნესის ფართო საზოგადოებისთვის გაცნობას.
ფესტივალი თბილისი მოლში გაიმართება და ერთ სივრცეში თავს მოუყრის დამწყებ მეწარმეებს ქვეყნის მასშტაბით. პროექტში გარდა დამწყები მეწარმეებისა მონაწილეობას მიიღებენ USAID-ის მიერ დაფინანსებულ ახალბედა ბიზნესმენები, მეწარმე ქალები, სტარტაპერები, რომელთათვისაც მსგავს გამოფენებში მონაწილეობა ახალია. „მეწარმეთა სივრცე 2018“-ის მიზანია საშუალება მისცეს დამწყებ მეწარმეებს საკუთარი პროდუქცია რაც შეიძლება მეტ ადამიანს გააცნონ.
გამოფენა-გაყიდვა 13.00 საათიდან საღამოს 18:00 საათამდე გაგრძელდება, სადაც დამთვალიერებლებს პროდუქციის მინიმალურ ფასად შეძენის შესაძლებლობაც მიეცემათ. ასევე დაგეგმილია სხვა წამახალისებელი აქტივობები, როგორც სტუმრებისთვის, ისე მონაწილეებისთვის.
ფესტივალზე დაჯილდოვდებიან ის ახალგაზრდა მეწარმეები, რომლებიც პროექტ „Yes Georgia“-ს ფარგლებში დაფინანსდნენ და წარმატებით უძღვებიან საკუთარ ბიზნესებს ქვეყნის მასშტაბით.
მონაწილეობის მსურველი აპლიკანტების შერჩევა უკვე დაწყებულია. განაცხადის წარდგენა 10 მარტამდე გაგრძელდება ვებ გვერდზე: www.yes-startup.ge ან www.yesstartup.ge. გამოფენაზე მონაწილეობა უფასოა და მას ორგანიზატორი პროგრამა „Yes-Georgia“ აფინანსებს.
„მეწარმეთა სივრცე - 2018“ ‘’საქართველოში ახალგაზრდების სამეწარმეო უნარ-შესაძლებლობების, დასაქმებისა და შემოსავლის გენერირების მხარდაჭერის პროგრამის’’ (YES-Georgia) ფარგლებში ხორციელდება.
პროგრამას ფონდი კრისტალი ახორციელებს საერთაშორისო ორგანიზაცია PH International და სს მისო „კრისტალთან“ ერთად.
პროგრამას ფინანსურ მხარდაჭერას უწევს ამერიკის შეერთებული შტატების საერთაშორისო განვითარების სააგენტო (USAID) და სს მისო „კრისტალი“.