„ადმინისტრაციულ სამართალდარღვევათა კოდექსში“ ცვლილებების შეტანა, რომელიც ღამის საათებში ხმაურზე ჯარიმების დაწესებას ითვალისწინებს, დეპუტატებს განსხვავებული მოსაზრებები აქვთ.

პროექტი დღეს, „ჯანმრთელობისა და სოციალური დაცვის“ კომიტეტმა ბიუროზე მეორედ შეიტანა და მისი დაჩქარებული წესით განხილვა მოითხოვა.

„კანონი ძალაში პირველ ოქტომბერს უნდა შევიდეს. მანამდე პატრული შესაბამისი აპარატურით უნდა აღიჭურვოს. მათ სპეციალური სასწავლო კურსი უნდა გაიარონ. მოსახლეობა გვაჩქარებს ამ ცვლილების შეტანას, რადგან სერიოზული პრობლემები ექმნებათ“, - განაცხადა ჯანდაცვის კომიტეტის თავჯდომარის პირველმა მოადგილე მირიან წიკლაურმა.

აღნიშნული კანონპროექტის დაჩქარებული წესით მიღებას საპარლამენტო უმრავლესობის წევრი დავით საგანელიძე არ დაეთანხმა.

„მიუხედავად იმისა, რომ მე კომიტეტის, ასევე ინიციატორების პოზიცია ძალიან კარგად მესმის, მიმაჩნია, რომ ეს საკითხი საკმაოდ რთული იქნება განხილვების მხრივ, რადგან არგუმენტები ორივე მხარეს არის. არის საკურორტო ზონები, ზაფხულის პერიოდი - ჩვენ ტურიზმთან დაკავშირებით ძალიან დიდი გეგმები გვაქვს. ოქტომბრიდან შევა თუ ნოემბრიდან, ამას ჩემი აზრით დიდი მნიშვნელობა არ აქვს. კარგად განვიხილოთ, ვიმსჯელოთ და მერე მივიდეთ დასკვნამდე“, - აღნიშნა საგანელიძემ.

საკუთარი მოსაზრება გამოთქვა საპარლამენტო უმრავლესობის დეპუტატმა ნუკრი ქანთარიამაც და განაცხადა, რომ ხმაურზე პრობლემა ძირითადად დიდ ქალაქებში იქმნება, მაგალითად თბილისში. ქანთარიას თქმით, ხმაურზე ჯარიმები საკურორტო ზონებში არ უნდა გავრცელდეს.

„ ეს თავისთავად პრობლემაა, ამაზე არ უნდა ვიდაოდ. ეს პრობლემა ძირითადად დიდ ქალაქებშია, სადაც საცხოვრებელ სახლებშია გახსნილი „დისკოთეკა“. მოსახლეობა აბსოლუტურად შეურაცხადია უკვე. მაგრამ, საკურორტო ზონებში არ შეიძლება ეს გავრცელდეს. მაგალითად ქობულეთში ხალხი იმიტომ მიდის, რომ გაერთოს“, - აღნიშნა ნუკრი ქანთარიამ.

დეპუტატებმა ამ კანონპროექტის დაჩქარებული წესით განხილვას მხარი არ დაუჭირეს. ცნობისთვის, „ადმინისტრაციულ სამართალდარღვევათა კოდექსში“ შესული ცვლილების თანახმად, ღამის საათებში 23:00 საათიდან 07:00 საათამდე ხმაურის დონე თუ 30 დბ-ს აღემატება, ფიზიკური პირი 150 ლარით დაჯარიმდება, იურიდიული პირი კი, 500 ლარით. თუ იგივე ქმედება განმეორებით იქნება ჩადენილი, ადმინისტრაციული სახდელის დაკისრებიდან ერთი წლის განმავლობაში, ჯარიმა ფიზიკური და იურიდიული პირებისთვის გაორმაგდება. ცნობისთვის, კანონპროექტის პირველი ვერსია, ხმაურზე ჯარიმების დაწესებას დღის საათებშიც ითვალისწინებდა. დღის საათად 07:00-დან 23:00 საათამდე განისაზღვრებოდა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კობახიძე ძმებ ფეიქრიშვილებზე: გამოძიება დაადგენს, მათ შორის, ციხის ადმინისტრაციის შესაძლო როლსაც

კობახიძე - გიორგი ნემსაძის გარდაცვალება უდიდესი დანაკარგია ქართული ფეხბურთისთვის

ნაკრების ყოფილი კაპიტანი გიორგი ნემსაძე 54 წლის ასაკში გარდაიცვალა

საკონსტიტუციო სასამართლოს სხდომიდან გააძევეს ხატია დეკანოიძე - ივანიშვილის დაკითხვის შუამდგომლობა არ დაკმაყოფილდა