ლავროვი: სკრიპალთან დაკავშირებით დიდი ბრიტანეთის ბრალდებები აღმაშფოთებელია

2018-03-15 14:40:01, 1942 ნახვა

მსოფლიო

სერგეი სკრიპალთან დაკავშირებით, დიდი ბრიტანეთის ბრალდებები აღმაშფოთებელია, - ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა.

მან ევროსაბჭოსთან მომავალ ურთიერთობებზეც გაამახვილა ყურადღება და აღნიშნა, რომ რუსეთი მზადაა, ბრიუსელთან პარტნიორული ურთიერთობა აღადგინოს.

„რუსეთი მზადაა თანამშრომლობისთვის, თუმცა ეს მაშინ მოხდება, როცა ევროპის ქვეყნებს ინტერესი დაეკარგებათ ამერიკის რუსოფობიური პოლიტიკის მიმართ, რომელშიც სანქციები და პროვოკაციები შედის“,- განაცხადა ლავროვმა.

მანვე აღნიშნა, რომ დიდი ბრიტანეთის დამოკიდებულება, ყოველგვარი ელემენტარული ურთიერთობის საზღვარს სცდება.

„ბრიტანეთის ბრალდებები აღმაშფოთებელია. მათი დამოკიდებულება ელემენტარული დიპლომატიური ურთიერთობების საზღვრებს სცდება. ჩვენ მშვიდად ვუპასუხებთ ამ ნაბიჯს, რადგან ჩვენ გვინდა ყველასთან საუბარი და პრობლემების მშვიდად მოგვარება. ჩვენ ამას გავაკეთებთ პატივისცემით, ყოველგვარი მასობრივი ისტერიის გარეშე“,- აღნიშნა ლავროვმა.

შეგახსენებთ, რომ ბრიტანეთის პრემიერ-მინისტრმა ტერეზა მეიმ, რუსეთის დაზვერვის ყოფილი ოფიცრის, სერგეი სკრიპალისა და მისი შვილის მოწამვლაში კრემლი დაადანაშაულა და ქვეყნიდან 23 რუსი დიპლომატის გაძევების გადაწყვეტილება მიიღო. ამასთან, პრემიერის თქმით, ბრიტანეთი რუსეთთან უმაღლეს დონეზე ყველანაირ კონტაქტს წყვეტს.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები