2018-02-16 16:21:49, 1602 ნახვა

---

გაბაშვილი: ფარცხალაძე აუდიტის სამსახურის წინა ხელმძღვანელს ფიზიკურად გაუსწროდა, რომ ეს დასკვნები არ დადებულიყო

თბილისის საკრებულოს ფრაქცია „ევროპული საქართველოს“ თავმჯდომარე გოკა გაბაშვილი უდიტის სამსახურის მიერ გამოქვეყნებულ დასკვნას, რომელიც მერიის საკუთრებაში არსებული უძრავი ქონების მართვასა და განკარგვას შეეხება, დადებითად აფასებს.

როგორც გაბაშვილმა განაცხადა, სწორედ აღნიშნული დასკვნის გამო დაესხა თავს ყოფილი მთავარი პროკურორი ოთარ ფარცხალაძე აუდიტის სამსახურის იმჟამინდელ უფროსს.

"ძალიან კარგია, რომ აუდიტის სამსახურმა ეს დასკვნა გამოაქვეყნა. იმიტომ, რომ ჩვენ გვახსოვს, რომ აუდიტის წინა ხელმძღვანელს ოთარ ფარცხალაძე ფიზიკურად დაესხა თავს, იმის გამო, რომ ეს დასკვნები არ დადებულიყო. აქ პირდაპირ ჩანს, რომ ფარცხალაძეს ქალაქის მერიამ ჩაუწყო პირობები, იმისთვის, რომ ყოფილ მთავარ პროკურორს ფინანსურად ეხეირა. მიუხედავად იმისა, რომ ფარცხალაძე თავს დაესხა აუდიტის წინა უფროსს, ეს უკვე ოფიციალური დოკუმენტია. შესაბამისად გამოძიება უნდა დაიწყოს და ყველა შეკითხვას პასუხი უნდა გაეცეს", - განაცხადა საკრებულოს წევრმა.

შეგახსენებთ, რომ სახელმწიფო აუდიტის სამსახურმა ანგარიში გამოაქვეყნა, რომელიც მერიის საკუთრებაში არსებული უძრავი ქონების მართვასა და განკარგვას შეეხება ანგარიშში ყოფილი მთავარი პროკურორის, ოთარ ფარცხალაძის კომპანიისთვის მიწის გადაცემის საკითხიც მოხვდა.

ანგარიშის თანახმად, ყოფილი მთავარი პროკურორის, ოთარ ფარცხალაძის კომპანიისთვის, "BSRCDG DEVELOPMENT"-ისთვის განსაკუთრებული პირობების და უკონკურენტო გარემოს შექმნამ, ქალაქის ბიუჯეტი მნიშვნელოვნად დააზარალა. კერძოდ კი, აუქციონში მონაწილეობა მხოლოდ ერთმა კომპანიამ მიიღო, რომელიც ყოფილ პროკურორს ეკუთვნის.

---

ავტორი: ,

---

დღის თემა

მთავარი თემა

ინტერვიუ - ექსკლუზივი