2018-02-16 12:48:16, 1582 ნახვა

---

ბახტაძე: ჩვენთვის პრიორიტეტულია მეწარმეები, საგადასახადო ორგანოებთან ურთიერთობისას, რაც შეიძლება ნაკლებ დროს ხარჯავდნენ

"ჩვენთვის პრიორიტეტულია მეწარმეები, რაც შეიძლება ნაკლებ დროს ხარჯავდნენ საგადასახადო ორგანოებთან ურთიერთობისას",- ამის შესახებ, საქართველოს ფინანსთა მინისტრმა, მამუკა ბახტაძემ განაცხადა.

მან დღეს გამართულ ბრიფინგზე დეტალურად ისაუბრა ახალი საგადასახადო ინიციატივის ძირითად პრინციპებზე. მინისტრის  განცხადებით, ახალი ინიციატივის ფარგლებში, მცირე ბიზნესის სტატუსს მიიღებს ყველა ის მეწარმე, რომლის შემოსავალი არ აღემატება 500,000 ლარს.
 
„დღეს, ეს ზღვარი არის 100,000 ლარი და ჩვენ 5-ჯერ ვზრდით ამ ზღვარს. ჩვენ ასევე 5-ჯერ ვამცირებთ გადასახადებს ჩვენი მეწარმეებისთვის და ნაცვლად დღეს არსებული 5%-იანი ზღვარიდან, ჩამოვდივართ 1%-იან ნიშნულამდე. ჩვენი მიზანია, მეწარმეები, რაც შეიძლება ნაკლებ დროს ხარჯავდნენ საგადასახადო ორგანოებთან ურთიერთობისას და ისინი მთლიანად იყვნენ ფოკუსირებულები თავიანთ ეკონომიკურ საქმიანობაზე. ჩვენ მივიღეთ გადაწყვეტილება, რომ მცირე მეწარმეები გავათავისუფლოთ ყველანაირი დამატებითი ბუღალტერიის წარმოებისგან. მცირე ბიზნესს ვალდებულება ექნება კანონმდებლობით დადგენილ შემთხვევებში გამოიყენოს მხოლოდ საკონტროლო-სალარო აპარატი და სასაქონლო ზედნადები," - განაცხადა მამუკა ბახტაძემ.
 
როგორც ფინანსთა მინისტრმა აღნიშნა,  დღეს არსებული პრაქტიკა გულისხმობს გადასახადების წინასწარ გადახდას ე.წ საავანსო რეჟიმში, მისი თქმით, აღნიშნული პრაქტიკა გაუქმდება და მცირე მეწარმეები     1%-იან ბრუნვის გადასახადს თვის ბოლოს გადაიხდიან
 
„მეხუთე და ძალიან მნიშვნელოვანი საკითხი- მცირე მეწარმეები, რომელიც მცირე მეწარმის სტატუსის პარალელურად ჩათვლიან  საჭიროდ დარეგისტრირდნენ დღგ-ს გადამხდელებად, ისინი სტანდარტულ რეჟიმში შეძლებენ დღგ-ს ჩათვლას, ან დღგ-ს ზედმეტობის დაბრუნებას ბიუჯეტიდან 5-დან 7 დღის ვადაში," - განაცხადა ბახტაძემ.

(NS)

---

ავტორი: ,

---

დღის თემა

მთავარი თემა

ინტერვიუ - ექსკლუზივი