თბილისის საქალაქო სასამართლოში დაკავებული მოქმედი და ყოფილი ფეხბურთელების სასამართლო პროცესი მიმდინარეობს.

საფეხბურთო კლუბ „ხარაგაულის ჩხერიმელას“ მოქმედი ფეხბურთელების-თემურ სანიკიძისა და გიორგი გოდერიძის ადვოკატი აცხადებს, რომ მისი დაცვის ქვეშ მყოფები დანაშაულს აღიარებენ. ადვოკატი,  აღკვეთის ღონისძიების სახით მათთვის გირაოს გამოყენებას მოითხოვს.

"ვფიქრობთ, სასამართლო  გაითვალისწინებს იმას, რომ ეს ორი პიროვნება არ არის ნასამართლევი" ,-აღნიშნა ადვოკატმა.

საფეხბურთო კლუბ „სტუ თბილისის“ პრეზიდენტის ოთარ შენგელიას ადვოკატი კი, აცხადებს, რომ შენგელია დანაშაულს არ აღიარებს. ადვოკატის მტკიცებით, შენგელიას ვალი ჰქონდათ და გამოძიების მიერ გავრცელებულ ვიდეომასალაში სწორედ მისი დაბრუნების პროცესია აღბეჭდილი.

ამასთან, აზიური ტოტალიზატორის - „ibcbet“-ის წარმომადგენელის ამიერკავკასიაში, ომარ ნაკაიძის ადვოკატი  ირწმუნება, რომ ნაკაიძეს საქმესთან შემხებლობა არ აქვს. ადვოკატის მტკიცებით, ის არის უბრალოდ სპორტული თამაშების მოყვარული და ონლაინ ტოტალიზატორებში თავის ფსონს ათავსებდა.

პროკურატურა კი,  სასამართლოს წინაშე შესულია შუამდგომლობით, რომ ე.წ. ჩაწყობილი თამაშების  საქმეზე დაკავებულ 8-ვე პირს წინასწარი პატიმრობა შეეფარდოს.

შეგახსენებთ, შინაგან საქმეთა სამინისტრომ კიდევ ერთი საქმე გამოავლინა, რომელიც  ჩაწყობილ თამაშებს უკავშირდება. სამართალდამცველებმა ორგანიზებული ჯგუფის მიერ პროფესიული სპორტული შეჯიბრებების მონაწილეთა მოსყიდვის ფაქტზე, საფეხბურთო კლუბ „სტუ თბილისის“ პრეზიდენტი ოთარ შენგელია, საფეხბურთო კლუბ “საჩხერის ჩიხურას“ ყოფილი სელექციონერი და ყოფილი ფეხბურთელი დავით გენძეხაძე, აზიური ტოტალიზატორის – „ibcbet“-ის წარმომადგენელი ამიერკავკასიაში, საფეხბურთო კლუბ „ხარაგაულის ჩხერიმელას“ მოქმედი  2 ფეხბურთელი, საფეხბურთო კლუბ „ქუთაისის ტორპედოს“ ერთი  ყოფილი ფეხბურთელი  და ასევე მოსყიდვაში მონაწილე ორი პირი დააკავეს.

გამოძიებამ დაადგინა, რომ დაკავებული პირები 10 000 ლარიდან 20 000 ლარამდე თანხის სანაცვლოდ, საქართველოს ეროვნულ საფეხბურთო ჩემპიონატში მონაწილე სხვადასხვა გუნდის წარმომადგენლებს, კონკრეტული საფეხბურთო მატჩების სასურველი შედეგით დასრულებისთვის ურიგდებოდნენ. შემდეგ, წინასწარ  მიღებული ინფორმაციის საფუძველზე, ონლაინ ტოტალიზატორებში შესაბამის ფსონებს ათავსებდნენ და მოგებულ თანხას ერთმანეთში ინაწილებდნენ.

შინაგან საქმეთა სამინისტრომ ფარული ვიდე-მასალაც გაავრცელა, სადაც  დეტალურად არის გადაღებული, თუ როგორ ხდება გარიგებები და თანხის აღება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

საქართველოს ბანკის პარტნიორმა კომპანია აგროტექნომ ქართულ ბაზარზე ახალი ბრენდი - Weitai შემოიყვანა

ცოფის შემთხვევის დაფიქსირების გამო, წალკაში კარანტინი გამოცხადდა

ბაზისბანკის მხარდაჭერით ფულის გლობალური კვირეულისადმი მიძღვნილი ნახატების კონკურსი "ჩემი რეგიონი - ჩემი ბანკნოტი" დასრულდა

RECSOL-მა Altaris-ის „საუკეთესო მწვანე ინიციატივის“ ჯილდო მიიღო - „თეგეტა ჰოლდინგის“ მხარდაჭერით საქართველოში საბურავების გადამმუშავებელი საწარმო შენდება