ე.წ. ფოტოგრაფების საქმეზე სასამართლომ დავით დევნოზაშვილი და ალექსანდრე მუხაძე დამნაშავედ ცნო

2017-07-20 16:33:51, 2449 ნახვა

სამართალი

თბილისის საქალაქო სასამართლომ ე.წ „ფოტოგრაფების საქმეზე“ ბრალდებულების ალექსანდრე მუხაძისა და დავით დევნოზაშვილის მიმართ გამამტყუნებელი განაჩენი დაადგინა.

სასამართლომ დავით დევნოზაშვილს 4 წლითა და 6 თვით, ხოლო ალექსანდრე მუხაძეს 1 წლითა და 6 თვის ვადით თავისუფლების აღკვეთა შეუფარდა.

მათვე 1 წლისა და 6 თვის ვადით ჩამოერთვათ საჯარო სამსახურში თანამდებობის დაკავების უფლება.

„სასამართლომ დადასტურებულად მიიჩნია ბრალდებულთა მხრიდან ბრალად წარდგენილი ქმედების ჩადენის ფაქტები.

კერძოდ, დავით დევნოზაშვილი დამნაშავედ ცნეს სამსახურებრივი უფლებამოსილების გადამეტებაში, ჩადენილი ძალადობით და დაზარალებულის პირადი ღირსების შეურაცხყოფით, რამაც ფიზიკური პირისა უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

რაც შეეხება ალექსანდრე მუხაძეს, ის გამტყუნდა სამსახურებრივი უფლებამოსილების გადამეტებისათვის , რამაც ფიზიკური პირის უფლების, საზოგადოების და სახელმწიფოს კანონიერი ინტერესის არსებითი დარღვევა გამოიწვია.

საქმეში არსებულ და სასამართლო სხდომებზე გამოკვლეულ მტკიცებულებათა ერთობლიობით, სასამართლომ დადგენილად მიიჩნია, რომ 2011 წელს ძალოვანი უწყებების ყოფილი მაღალჩინოსნების მხრიდან სამსახურებრივი უფლებამოსილების გადამეტება.

კერძოდ, დავით დევნოზაშვილმა, რომელიც იმ პერიოდში იკავებდა საქართველოს შსს კონტრდაზვერვის დეპარტამენტის თბილისის ტერიტორიული სამმართველოს უფროსის მოადგილის თანამდებობას, სასჯელაღსრულების N8 დაწესებულების დირექტორის ალექსანდრე მუხაძის ხელშეწყობით, დაკავებულ პირებთან შეხვედრის წესების უგულვებელყოფით, არაოფიციალურად ცალ-ცალკე შეხვდა ე.წ. „ფოტოგრაფების საქმეზე“ დაკავებულ პირებს და მათგან ფსიქოლოგიური ზეწოლისა და დაშინების გზით მოიპოვა წინასწარ შეთხზული ცრუ აღიარებითი ჩვენებები, ჯაშუშურ ქსელში მონაწილეობის შესახებ“, - ნათქვამია სასამართლოს განცხადებაში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან