აბაშიძე: გაერო-ში საქართველოს რეზოლუციების მხარდამჭერი ქვეყნების რაოდენობა ყოველწლიურად იზრდება

2017-06-02 15:41:17, 2586 ნახვა

პოლიტიკა საზოგადოება კომენტარი

საქართველოს პრემიერ-მინისტრის სპეციალური წარმომადგენელის რუსეთთან ურთიერთობის საკითხებში ზურაბ აბაშიძის განცხადებით, დევნილებისა და ლტოლვილების უფლებების დაცვა სახელმწიფოს მოვალეობაა და ქვეყანა ამას უმაღლეს დონეზე აკეთებს

ამის შესახებ ზურაბ აბაშიძემ გაერო-ს 71-ე სესიაზე საქართველოს მიერ ინიცირებული რეზოლუციის მხარდაჭერის კომენტირებისას განაცხადა.

როგორც აბაშიძემ აღნიშნა, გაეროს ასამბლეაზე საქართველოს რეზოლუციისთვის მხარი აქამდეც დაუჭერიათ, თუმცა მხარდამჭერი ქვეყნების რიცხვი წლიდან წლამდე მატულობს.

მისივე თქმით, დევნილებს უნდა ჰქონდეთ იმის განცდა, რონ მათ საერთაშორისო საზოგადოება ყურადღებას აქცევს.

რაც შეეხება ოკუპირებულ ტერიტორიებზე შეუფერხებელი ჰუმანიტარული მისიის განხორციელებას, აბაშიძის განმარტებით, ამ საკითხში საქართველო რუსეთის წინააღმდეგობრივ პოზიციას აწყდება.

ამასთან, მისივე თქმით, საერთაშორისო ორგანიზაციების პრინციპული პოზიციის შემთხვევაში, შესაძლოა, საქართველოს ხელისუფლებამ შედეგს მიაღწიოს.

შეგახსენებთ, რომ გაერო-ს გენერალურმა ასამბლეამ გუშინ 71-ე სესიაზე კიდევ ერთხელ მიიღო საქართველოს მიერ ინიცირებული რეზოლუცია „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ".

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან