ელგუჯა ხოკრიშვილი მყინვარ დევდორაკზე და მდ. ამალის ხეობაში სტიქიური პროცესების მიმდინარეობას შეისწავლის

2015-04-06 18:06:09, 501 ნახვა

საზოგადოება

გარემოსა და ბუნებრივი რესურსების დაცვის მინისტრი ელგუჯა ხოკრიშვილი, დაბა ყაზბეგში, შვეიცარიელ ექსპერტებთან ერთად, მყინვარ დევდორაკზე და მდ. ამალის ხეობაში სტიქიური პროცესების მიმდინარეობას შეისწავლის.

როგორც „ექსპრესნიუსს“ გარემოს დაცვის სამინისტროდან აცნობეს, აღნიშნულტან დაკავშირებით დღეს მინისტრი მცხეთა-მთიანეთის რეგიონს ესტუმრა.

გარემოს ეროვნულ სააგენტოსა და შვეიცარიულ კომპანია „GEOTEST"-ს შორის გაფორმებული ხელშეკრულების საფუძველზე შვეიცარიელი ექსპერტები სტიქიური პროცესების შესწავლის შემდეგ, ადრეული შეტყობინების სისტემის კონცეფციას შეიმუშავებენ. სპეციალისტები ადგილზე შეარჩევენ ტერიტორიებს , სადაც განლაგდება ადრეული შეტყობინების სისტემისათვის საჭირო ხელსაწყო-დანადგარები.

ადრეული გაფრთხილების სისტემა გარემოს ეროვნულ სააგენტოს საშუალებას მისცემს სტიქიურ პროცესებზე რეაგირება რამდენიმე წუთის წინსწრებით მოახდინოს, რის შემდგომაც შესაძლებელი გახდება სტიქიური პროცესების ფიქსაცია და განგაშის გამოცხადება.

ასევე, აღნიშნული სისტემის დამონტაჟებით შესაძლებელი გახდება საქართველოს სამხედრო გზაზე მოძრავი როგორც ადგილობრივი ისე ტრანზიტული ავტოსატრანსპორტო საშუალებების მძღოლებისა და ქვეითად მოსიარულეების უსაფრთხო გადაადგილების უზრუნველყოფა.

ექსპერტები საქართველოში გარემოს ეროვნული სააგენტოს მოწვევით იმყოფებიან.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან