პირები, რომლებმაც მუნიციპალური ტრანსპორტით უბილეთოდ იმგზავრეს და ეს სამართალდარღვევა 2015 წლის 1 იანვრამდე ჩაიდინეს, დაკისრებული ჯარიმებისა და საურავებისგან სრულად თავისუფლდებიან. 

აღნიშნულს, იუსტიციის სამინისტროს მიერ  მომზადებული ამნისტიის შესახებ კანონპროექტი ითვალისწინებს, რომელსაც საქართველოს პარლამენტი უკვე განიხილავს. 
პროექტის თანახმად, საერთო ჯამში სახელმწიფო სამართალდამრღვევებს მილიონ ორასი ათასამდე ლარის გადახდის ვალდებულებისაგან ათავისუფლებს.

როგორც იუსტიციის სამინისტროში აცხადებენ, ჯარიმებისაგან 20850 პირი თავისუფლდება.
 
ამჟამად კი, იუსტიციის სამინისტროს მმართველობის სფეროში მოქმედი სსიპ „აღსრულების ეროვნული ბიუროს“ წარმოებაში მუნიციპალური ტრანსპორტით უბილეთოდ მგზავრობასთან დაკავშირებით  21000-ზე მეტი საქმეა.

„ მნიშვნელოვანია, რომ იმ პირთა დიდი უმრავლესობა, რომელთაც მუნიციპალური ტრანსპორტით უბილეთოდ მგზავრობისათვის ჯარიმა დაეკისრათ, სოციალურად დაუცველი, პენსიონერი ან სტუდენტია. სახდელისაგან გათავისუფლება, ერთი მხრივ, მოქალაქეებს მცირედ ფინანსურ შეღავათს მისცემს, ხოლო, მეორე მხრივ, სახელმწიფოსაც გაათავისუფლებს ასეთი საქმეების აღსრულებისათვის საჭირო მნიშვნელოვანი ოდენობის ადმინისტრაციული რესურსის ფუჭად ხარჯვისაგან“, – აცხადებენ სამინისტროში. 
 
მათივე ინფორმაციით, ავტობუსის ჯარიმებისგან შეჭირვებული მოსახლეობის გათავისუფლების შესახებ გადაწყვეტილება იუსტიციის მინისტრმა 2014 წლის ზაფხულში, აღსრულების ეროვნული ბიუროს მიერ ჩატარებული მიმდინარე საქმეების ინვენტარიზაციის შედეგების გაცნობის შემდეგ მიიღო. 

 სამინისტროს მიერ გავრცელებულ განცხადებაში ნათქვამია,რომ ინვენტარიზაციის ანგარიშში გამოჩნდა, რომ 21000 აღსასრულებელი საქმე საზოგადოების ყველაზე შეჭირვებულ ფენას ეხებოდა და სწორედ ავტობუსის ჯარიმებს უკავშირდებოდა. მინისტრი გამოვიდა ინიციატივით, რომ ამ ჯარიმების აღსრულებაზე ამნისტია გამოცხადებულიყო. აღნიშნული ინიციატივა გაიზიარა პრემიერმა და მთავრობამ, მათ შორის, ფინანსურმა ბლოკმაც და გასულ წელს მთავრობის ინიციატივად დარეგისტრირდა.

იუსტიციის მინისტრ თეა წულუკიანის განცხადებით, მან აღნიშნული გადაწყვეტილება ერთჯერადად,  შეჭირვებული მოსახლეობისთვის შვების მისაცემად მიიღო. 

„არაა იოლი, უყურო, როგორ მოდის აღმასრულებელი და გთხოვს, გადაიხადო ავტობუსის ჯარიმა, რომელიც არ გაქვს და რომელიც იზრდება ყოველდღიურად. გამორიცხულია, ასეთ ხალხს შინ მიადგეს აღსრულების პოლიცია. თუმცა, აქვე დავძენთ, რომ ამ ამნისტიას სისტემური ხასიათი ვერ ექნება. საჭიროა მეტი მუშაობა საზოგადოებასთან პრევენციისთვის, რომ ადამიანებმა იცოდნენ, რა მოჰყვება ჯარიმის გადაუხდელობას. ჩემთვის, ასევე, მნიშვნელოვანია, შესაბამისმა კომპანიებმა გაიგონ, რომ აუცილებელია, ავტობუსში ასვლისთანავე ხვდებოდეს მოქალაქეს მაკონტროლებელი და მიუთითებდეს ბილეთის აღებისკენ, ვიდრე უბილეთო მოქალაქეს უსაფრდებოდეს მაკონტროლებელი უკვე დაძრულ ავტობუსში.  ჩვენ უნდა ვიმუშაოთ ასე მანამ, სანამ ეს ჩვევა გახდება. საქართველოში ისეც ძალიან მძიმე სოციალური ფონია და არ შეიძლება ადამიანს ჩაუსაფრდე, რომელიც 50 თეთრს ვერ იხდის, შემდეგ ეს 50 თეთრი − 5 ლარად, შემდეგ კი  75 ლარად იქცევა“, − განაცხადა მინისტრმა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

უკრაინა რუსეთს ზედიზედ მესამე დღეა უტევს რეკორდული რაოდენობის დრონებით

რუსეთის საარჩევნო კომისია, საზღვარგარეთ მცხოვრებ რუსებს არჩევნებში მონაწილეობის მიღებას აუკრძალავს, ივანიშვილის რეჟიმმა პუტინს ნახევარი წლით დაასწრო

კობახიძე ოკუპირებულ აფხაზეთში საწვავის შეტანაზე- ჩვენთვის მიზანი არა ფულის შოვნა, არამედ ნდობის აღდგენა იყო

კობახიძე- თეორიულადაც ვერ წარმომიდგენია, რატომ შეიძლება შეექმნას ღარიბაშვილის ოჯახს საფრთხე