2017-03-06 14:39:26, 2106 ნახვა

---

ცისკარიშვილი პრემიერის ინიციატივაზე: ნებისმიერი ომბუდსმენი ხელისუფლების ფრთებს ქვეშ, საზოგადოებისთვის მისაღები ვერ იქნება

„იდეას მივესალმები, მაგრამ გამოცდილება გვაძლევს იმის საშუალებას, რომ ეჭვი შევიტანოთ მთავრობის მიერ ჩამოყალიბებულ ასეთ ორგანიზაციაში“, - ასე აფასებს დამოუკიდებელ ექსპერტთა კლუბის პრეზიდენტი სოსო ცისკარიშვილი მედიაომბუდსმენის ინსტიტუტის შექმნასთან დაკავშირებით პრემიერ-მინისტრ გიორგი კვირიკაშვილის ინიციატივას.

როგორც  ცისკარიშვილმა „ექსპრესნიუსს“ განუცხადა, ინიციატივა გონივრული იქნება, თუ მედიაომბუდსმენი სახალხო დამცველის ინსტიტუტის შემადგენლობაში შევა.

მისივე განმარტებით, სხვა მხრივ ნებისმიერი ომბუდსმენობა როგორც წინა, ასევე დღევანდელი ხელისუფლების პირობებში, ფიქციაა.

„ძალიან მწარე გამოცდილება გვაქვს უკანასკნელი წლების განმავლობაში, როდესაც დაინიშნა სრულიად შეუფერებელი პირი თანამდებობაზე, რასაც ერქვა  ბიზნესომბუდსმენი. დღეს ის არის ეკონომიკის და მდგრადი განვითარების მინისტრი, მაგრამ ვერანაირი მდგრადობა ვერ შევამჩნიეთ მას როცა იგი ბიზნესომბუდსმენი იყო. იდეას მივესალმები, მაგრამ გამოცდილება გვაძლევს საშუალებას, ეჭვი შევიტანოთ მთავრობის მიერ ჩამოყალიბებულ  ასეთ ორგანიზაციაში.   ეს უნდა იყოს ან კონსტიტუციური რაიმე მნიშვნელობის მქონე თემა, ან უნდა შევიდეს, ომბუდსმენის ინსტიტუტის შემადგენლობაში, რაც უფრო გონივრული იქნება. სხვა მხრივ ნებისმიერი ომბუდსმენობა  როგორც წინა ხელისუფლების დროს, ასევე დღევანდელი ხელისუფლების პირობებში, არის ფიქცია. როცა ომბუდსმენი მთავრობის თავმჯდომარის ოთახთან  საქმიანობს, იქ არც საჩივრით მივა რომელიმე ჩაგრული და ვის წინაშე უნდა გაატაროს ომბუდსმენობა ამ ომბუდსმენმა?!“, - განაცხადა ცისკარიშვილმა.

ექსპერტის თქმით, მედია ომბუდსმენი, რომელიც „კადრებთუხუცესის“ მიერ იქნება დანიშნული, სავარაუდოდ, თვალყურს მიადევნებს, „ვინმემ რამე ისეთი ფრაზა არ გააჟღეროს მედიაში“.

„ჩვენთვის ძირითადი ომბუდსმენი იყო და იქნება  ჩვენივე მკითხველი, მაყურებელი და მსმენელი. ვინ იქნება ის ადამიანი, რომელიც ამ სამ კატეგორიას დაუკმაყოფილებს საკუთარ ინტერესებს, დიდი ალბათობით მთავარი დანიშნულება ასეთი ომბუდსმენის, რომელიც რასაკვირველია დანიშნული იქნება ჩვენი კადრებთუხუცესის მიერ, თვალყურს მიადევნებს მედიასივრცეს. ნებისმიერი ომბუდსმენი ხელისუფლების ფრთებს ქვეშ, საზოგადოებისთვის მისაღები ვერ იქნება“, - დასძინა ცისკარიშვილმა.

ცნობისთვის, საქართველოს პრემიერ-მინისტრი გიორგი კვირიკაშვილი მედიაომბუდსმენის ინსტიტუტის ჩამოყალიბების ინიციატივით გამოდის და სათანამშრომლოდ საერთაშორისო დონის მედიაექსპერტებს და სპეციალისტებს იწვევს.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი