ბიზნესომბუდსმენი გიორგი გახარია საქართველოს–ისრაელის ბიზნეს პალატის პრეზიდენტს იციკ მოშეს შეხვდა. 

ინფორმაციას პრემიერის პრესსამსახური ავრცელებს. 

მათივე ცნობით, შეხვედრაზე  ებრაელი ინვესტორის  მეირ შავიტისა და მისი კომპანიების გახმაურებულ საქმესთან დაკავშირებული  საკითხები განიხილეს.

„შევთანხმდით, რომ ჩვენი მხრივ კიდევ უფრო მეტ ყურადღებას მივაქცევთ, თუ როგორ მიმდინარეობს ეს საგადასახდო შემოწმება, რატომ გაჭიანურდა დროში და ვეცდებით ყველანაირად ჩვენი კომპეტენციის ფარგლებში, ჩვენი რეკომენდაციებით დავუმტკიცოთ შემოსავლების სამსახურს, რომ  საკითხი სწრაფად არის გადასაწყვეტი,“–განაცხადა გიორგი გახარიამ შეხვედრის დასრულების შემდეგ.

ცნობისთვის, ებრაელი ბიზნესმენი მეირ შავიტი პრემიერ-მინისტრის ირაკლი ღარიბაშვილის „ფეისბუქის“ ოფიციალურ გვერდზე წერდა, რომ მასზე სახელმწიფო მოხლეები ზეწოლას ახორციელებენ. 
„ბატონო ირაკლი მე ებრაელი ინვესტორი ვარ ისრაელიდან მეირ შავიტი - მხატვარი დიზაინერი - გეხსომებით ალბათ .... გასაქცევად მიქმნიან საქმეს კორუმპირებული სახელმწიფო მოხელეები და ვერავის ვერ მოგაწვდინეთ ხმა ,,, იქნებ თქვენ მაინც მომაქციოთ ყურადღება ... ბოდიშს ვიხდი რომ აქ ვწერ ... ყველა გზა ამოვწურე და ხმაური კი არ მინდა ! გთხოვთ!“,  - ამბობს მეირ შავიტი.

ამასთან, პოლიტიკურმა გაერთიანება „რეფორმატორებმა“ ინფორმაცია გაავრცელეს, რომლის თანახმადაც ფინანსთა სამინისტრო და ფინანსური პოლიცია ებრაელი ბიზნესმენის მეირ შავიტის მიმართ რამდენიმე მილიონი ლარის გამოძალვის მიზნით ტერორს ახორციელებს. 

გუშინ, კი საქართველო-ისრაელის ბიზნეს პალატის პრეზიდენტი იციკ მოშე, ისრაელელი ინვესტორის მეირ შავიტის  საკითხს გამოეხმაურა.  როგორც იციკ მოშე მის მიერ გავრცელებულ განცხადებაში ამბობს, კომპანიებში საგამოძიებო სამსახურის რამდენიმე თვიანი ყოფნა, ბიზნესზე ზეწოლის განხორციელების მცდელობის ნიშნებს შეიცავს. ეს კი, მოშეს შეფასებით, პრემიერ-მინისტრის ირაკლი ღარიბაშვილის მიერ ბიზნეს ფორუმებზე გაცხადებულ პრინციპებს ეწინააღმდეგება, რომ მთავრობა ინვესტორთა დაცვის გარანტორი იქნებოდა.   

მან საქართველოს პრემიერს მიმართა, რომ ისრაელი ინვესტორებისთვის საქართველოს მთავრობაში კონკრეტული პიროვნება გამოიყოს, რომელიც  ისრაელელი ინვესტორებისთვის, მსგავსი პრობლემების შემთხვევაში, იქნება საკონტაქტო პირი, რომელსაც ყოველგვარი ბიუროკრატიული პროცედურების გარეშე შეეძლება საჭირო უწყებებს ინვესტორების პრობლემები და ინტერესები გააცნოს. 

დღეს, პრემიერი იციკ მოშეს ინიციტივას გამოეხმაურა და განაცხადა, რომ მან ებრაელი ინვესტორების საკითხის შესწავლა ბიზნეს ომბუდსმენს უკვე დაავალა.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კინოპროდიუსერი და კინოთეატრების ქსელ კავეას ხელმძღვანელი ოთარ ბუბაშვილი გარდაიცვალა

მარინ ლეპენი დემოკრატიის საფრთხის შესახებ აფრთხილებს და მაკრონის მთავრობას აკრიტიკებს

ფასების ზრდის წინააღმდეგ საპროტესტო აქციები: მილანში 50 ადამიანი დააკავეს, შეტაკებები ტურინსა და ბოლონიაშიც

თურქ მომღერალ ილიას იალჩინტაშს ნარკოტიკებთან დაკავშირებულ საქმეში მინიმუმ 10 წლით თავისუფლების აღკვეთა ემუქრება