ნოდარ ხადური თურქეთის ვაჭრობისა და საბაჟო საკითხთა მინისტრს შეხვდება

2016-09-23 16:15:11, 1524 ნახვა

ეკონომიკა

4 ოქტომბერს, საქართველოს ფინანსთა მინისტრ ნოდარ ხადურის მოწვევით, საქართველოში სამუშაო ვიზიტით თურქეთის რესპუბლიკის ვაჭრობისა და საბაჟო საკითხთა მინისტრი ბიულენთ თუფენქჯი ჩამოვა.

ფინანსთა სამინისტროს ინფორმაციით, აღნიშნული ვიზიტის შესახებ გადაწყვეტილება 26 იანვარს, ანკარაში, საბაჟოს საერთაშორისო დღის ეგიდით გამართულ ორმხრივ შეხვედრაზე მიიღეს.

მხარეები მიმოიხილავენ ორმხრივ და რეგიონულ ჭრილში უსაფრთხო ვაჭრობის ხელშეწყობისთვის საბაჟო ადმინისტრაციების მიერ გაწეულ საქმიანობას, დასახავენ სატრანსპორტო დერეფნის კონკურენტუნარიანობის ამაღლების სამომავლო გეგმებს, მათ შორის, ადმინისტრაციული დანახარჯების შემდგომი შემცირების ხარჯზე.

განსაკუთრებული ყურადღება დაეთმობა, თურქეთის მხარეს, „სარფის" საბაჟო-გამშვები პუნქტის რეკონსტრუქციისას მგზავრების, ტვირთისა და სატრანსპორტო საშუალებების გადაადგილების შეფერხების თავიდან აცილების მიზნით, ქართველი და თურქი მებაჟეების კოორდინაციის გაუმჯობესებას, აგრეთვე, ახალქალაქი-ყარსის მიმართულებით ახალი სარკინიგზო ხაზით გადაადგილებული ტვირთისა და მგზავრების მიმართ მოქნილი და მოდერნიზებული საბაჟო პროცედურების დანერგვას.

ვიზიტის ფარგლებში დაგეგმილია თურქეთის ვაჭრობის და საბაჟო საკითხთა მინისტრის შეხვედრები საქართველოს ხელისუფლების წარმომადგენლებთან და საქართველოს საბაჟო ინფრასტრუქტურის (მათ შორის გაფორმების ეკონომიკური ზონის) მონახულება.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან