2016-09-10 13:32:43, 817 ნახვა

---

სალომე სამადაშვილი: ბატონმა კობახიძემ ძალადობასთან დაკავშირებით პრეტენზიები საკუთარ გუნდს უნდა წაუყენოს

„ნაციონალური მოძრაობის“ წევრი სალომე სამადაშვილი „ქართული ოცნების“ წევრის ირაკლი კობახიძის ბრალდებებს ეხმაურება და აღნიშნავს, რომ ხელისუფლებს სურს, წინასაარჩევნო პროცესი უსაფუძვლო ბრალდებების ასპარეზად გადააქციოს.

„ძალადობრივ თავდასხმებსა და პროვოკაციებს რაც შეეხება, ჩვენ ვნახეთ, რომ მსგავსი თავდასხმა კორცხელში უკვე მოხდა, ხოლო მოძალადეები დაუსჯელები დარჩნენ. ბატონი კობახიძე არასწორ ადრესატს ეძებს და მან ძირითადი პრეტენზიები საკუთარ ხელისუფლებას უნდა განუცხადოს, რომელმაც კორცხელში ძალადობის აღკვეთა ვერ მოახერხა. „ქართული ოცნება“ ყველანაირი გამოკითხვით არჩევნებს აგებს. როგორც ჩანს, წაგებული არჩევნების წინ გადაწყვიტეს, რომ წინასაარჩევნო პროცესი უსაფუძვლო ბრალდებების ასპარეზად გადააქციონ. ვფიქრობ, ეს ყოველივე მმართველ გუნდს ძალიან ცუდად დაუბრუნდება. ქართველი ამომრჩეველი ამ  გაკოტრებული პოლიტიკური ძალისგან ახსნა-განმარტებას მოელის, თუ რატომ უნდა დარჩნენ ხელისუფლებაში. მმართველ გუნდს ამის არგუმენტები არ გააჩნია - მათი წინასაარჩევნო პროგრამა აბსურდულია. ვფიქრობ, ჯობს არჩევნების წასაგებად წყნარად მოემზადონ“, - განაცხადა „ექსპრესნიუსთან“ საუბრისას სამადაშვილმა.

შეგახსენებთ, რომ „ქართული ოცნების“ აღმასრულებელი მდივნის ირაკლი კობახიძის განცხადებით, „ბოლო დღეებში განვითარებულმა მოვლენებმა დაგვარწმუნა, რომ პროვოკაციები რეალურად არის მოსალოდნელი“.

ირაკლი კობახიძის თქმით,  ჯერჯერობით   პროვოკაციების მასშტაბი არ არის დიდი, თუმცა დინამიკა  მზარდია.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი