2016-07-20 16:28:49, 737 ნახვა

---

მანანა კობახიძე: 4 წლის განმავლობაში, საჩხერეში ყველაზე დიდ მიღწევად ხალხის სიყვარულის მოპოვებას ვთვლი

საპარლამენტო უმრავლესობის წევრისა და საჩხერის მაჟორიტარი დეპუტატის მანანა კობახიძის განცხადებით, ის მაჟორიტარად კენჭს აღარ იყრის და პარლამენტში მოხვედრას, სავარაუდოდ, საპარლამენტო სიით ეცდება.

როგორც „ექსპრენიუსს“ კობახიძემ განუცხადა, 2012 წელს სხვა რეალობა იყო, ახლა კი, ჯობს, საჩხერეში კენჭი საჩხერელმა იყაროს.

„საკუთარ თავზე ლაპარაკი ძალიან რთულია. თავად საჩხერის მოსახლეობამ უნდა შეაფასოს თუ რამდენად კარგად იმუშავა მათმა დეპუტატმა 4 წლის განმავლობაში. 2012 წელს იყო სულ სხვა რეალობა. მაშინ ბატონ ბიძინას იმჟამინდელმა ხელისუფლებამ ყველანაირი პრობლემა შეუქმნა, რათა არ მომხდარიყო მისი პარტიის თავმდჯომარედ არჩევა. აქედან გამომდინარე, 2012 წელს მუშაობა ექსტრემლურ სიტუაციაში გვიწევდა.

2012 წელს ბატონმა ბიძინამ მე დამასახელა პარტიის თავმჯდომარედ და ალბათ, სიმბოლური დატვირთვა ჰქონდა, რომ იქ მეყარა კენჭი, საიდანაც ბატონი ბიძინა იყო წარმოშობით. სწორედ საჩხერის მოსახლეობამ განიცადა ძალიან დიდი რეპრესიები ბატონი ბიძინას ერთგულებისთვის. საჩხერე სწორედ გამარჯვებასთან ასოცირდებოდა. თუმცა, მე საჩხერესთან არანაირი შეხება არ მქონია და ეს მაჟორიტარისთვის ძალიან რთულია. თუმცა, ამ ქალაქთან განსაკუთრებული ურთიერთობა ჩამომიყალიბდა და ვცდილობდი, ყველა ის პრობლემა, რომელიც ჩემამდე მოდიოდა, შეძლებისდაგვარად მომეგვარებინა. მეორე ამბავია ის, რომ ბატონ ბიძინას იმხელა დამსახურება აქვს ქვეყნისა და  ამ რაიონის მიმართ, როდესაც საჩხერე გადაარჩინა მან დაცლისგან იმ დახმარებით, რომელსაც ბატონი ბიძინა ამ ადამიანებს უწევდა. სკოლები, გზები, სახელბის გადახურვა, სოციალური დახმარება, წყალი, შუქი, გაზი და ა.შ.  ის, რომ დღეს ეს ყველაფერი არის საჩხერეში, ეს სწორედ ამ ადამიანის დამსახურებაა. შესაბამისად, ვინც არ უნდა იყოს იქ მაჟორიტარი, შეუძლებელია ამ ადამიანის მეათასედი მაინც შეძლოს. ახლა საჩხერეს ძალიან კარგი გამგებელი ყავს. ბევრ რამეს აკეთებს დღეს გამგებელი მაშინ როდესაც, ყოფილი გამგებელი და გამგეობის თანამშრომლები „ნაციონალური მოძრაობიდან“ თვლიდნენ, რომ ყველაფერი ივანიშვილს უნდა ეკეთებინა და თვითონ მარტო პრემიებს იღებდნენ. ამ მოცემულობიდან, ვფიქრობ, რომ ჯობს საჩხერეში კენჭი იქაურმა ადამიანმა იყაროს.  სწორედ ასეთია პაატა კვიჟინაძე. მით უმეტეს, მაშინ, როდესაც გადაწყდა, რომ კონსერვატიული პარტია ცალკე აღარ გამოვა არჩევნებში და ისინი ჩვენი პარტნიორები გახდნენ. თუმცა, საჩხერეში ყველა მოიგებდა არჩევნებს კვიჟინაძეც და მანანა კობახიძეც“, - განაცხადა კობახიძემ.

როგორც დეპუტატმა აღნიშნა, საჩხერეში 4 წლის განმავლობაში მისი ყველაზე დიდი დამსახურება ხალხის სიყვარულის მოპოვებაა.

შეგახსენებთ, რომ მმართველმა გუნდმა საჩხერის მაჟორიტარი დეპუტატობის კანდიდატად პაატა კვიჟინაძე დაასახელა.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი