აშშ-ის კონგრესი საქართველოს ტერიტორიული მთლიანობის მხარდამჭერი რეზოლუციის პროექტს განიხილავს

2016-07-14 17:31:24, 634 ნახვა

პოლიტიკა

აშშ-ის წარმომადგენელთა პალატის საგარეო ურთიერთობათა კომიტეტი 14 ივლისს საქართველოს ტერიტორიული მთლიანობის მხარდამჭერი რეზოლუციის პროექტს განიხილავს, - აღნიშნულის შესახებ დოკუმენტის ტექსტი კონგრესის ოფიციალურ ვეგვერდზეა გამოქვეყნებული.

როგორც პროექტშია ნათქვამი, წარმომადგენელთა პალატა “სტიმსონის დოქტრინის” სახელით ცნობილ აშშ-ის პოლიტიკას, არ აღიაროს ძალის გამოყენების შედეგად განხორციელებული ტერიტორიული ცვლილებები მხარს უჭერს.

დოკუმენტის თანახმად, კონგრესმენები რუსეთის მიერ საქართველოში სამხედრო ინტერვენციასა და ოკუპაციას, ასევე აფხაზეთისა და ცხინვალის რეგიონების საოკუპაციო ხაზის გასწვრივ მიმდინარე არალეგალურ ქმედებებს გმობენ.

წარმომადგენელთა პალატა რუსეთის ფედერაციას მოუწოდებს, საქართველოს რეგიონების, აფხაზეთისა და სამხრეთ ოსეთის დამოუკიდებელ ქვეყნებად აღიარება გააუქმოს და ისეთი ქმედებებისა და პოლიტიკისგან შეიკავოს თავი, რომელიც საქართველოს სუვერენიტეტსა და ტერიტორიულ მთლიანობას არღვევს. ამერიკელი კანონმდებლები ოფიციალურ მოსკოვს ასევე მოუწოდებემ, ცეცხლის შეწყვეტის შესახებ 2008 წლის შეთანხმების შესრულებისკენ.

რეზოლუციის პროექტში აღნიშნულია ჟენევის დისკუსიების ფარგლებში განხილულ საკითხებთან, მათ შორის ძალის გამოუყენებლობასთან, დაკავშირებით პროგრესის მიღწევის, ასევე ოკუპირებულ რეგიონში უსაფრთხოების მექანიზმების შექმნისა და იძულებით გადაადგილებული პირების ღირსეული და უსაფრთხო დაბრუნების აუცილებლობა.

ამასთან, წარმომადგენელთა პალატა აშშ-ის მთავრობას მოუწოდებს, საქართველოსთან თანამშრომლობა აშშ-საქართველოს სტრატეგიული პარტნიორობის სფეროებში, მათ შორის საქართველოს ევროატლანტიკური ინტეგრაციის მხრივ გააღრმავოს.

წარმომადგენელთა პალატის წევრები ადასტურებენ, რომ "თავისუფალი, ერთიანი, დემოკრატიული და სუვერენული საქართველო აშშ-ის გრძელვადიან ინტერესში შედის, რადგან ეს რეგიონში მშიდობასა და სტაბილურობას უწყობს ხელს".