თეა წულუკიანი: ყველა ის ხარჯი, რომელიც ეკონომიკის ზრდაზე არ მუშაობს, შემცირებული იქნება

2015-03-03 12:25:14, 582 ნახვა

პოლიტიკა

"ყველა ის ხარჯი, რომელიც ეკონომიკის ზრდაზე არ მუშაობს, შემცირებული იქნება",-ამის შესახებ საქართველოს იუსტიციის მინისტრმა თეა წულუკიანმა ჟურნალისტებს განუცხადა.
მისივე განმარტებით, კონკრეტულად თუ რა ხარჯები იქნება შემცირებული, იუსტიციის სამინისტრო ამ საკითხზე გეგმას 2 კვირაში დადებს.
"ეს იქნება იმ ხარჯების შემცირება, რომელიც არ რჩება ქვეყნის ეკონომიკურ განვითარებაში. ჩვენ იუსტიციის სამინისტროში უფრო სწრაფად დავხარჯავთ იმ თანხებს, რომელიც ეხება მშენებლობებს, რადგან ეს ის თანხაა, რომელიც ილექება ეკონომიკაში და ეხმარება ეკონომიკის დარგს. ყველა ის ხარჯი, რომელიც ეკონომიკის ზრდაზე არ მუშაობს, იქნება შემცირებული. გეგმას დავდებთ ორ კვირაში",-აღნიშნა თეა წულუკიანმა.
რაც შეეხება შინაგან საქმეთა სამინისტროს, მინისტრ ვახტანგ გომელაურის განმარტებით, სხვადასხვა დეპარტამენტი ხარჯების შემცირებაზე უკვე მუშაობს, თუმცა ჯერჯერობით არ საუბრობს, კონკრეტულად რომელ დეპარტამენტს შეეხება ქამრების შემოჭერის პოლიტიკა.
"ზუსტად ვერ გეტყვით შეცდომაში რომ არ შევიყვანოთ საზოგადოება. ამაზე მუშაობენ შესაბამისი სამსახურები, დეპარტამენტები.აუცილებლად გაცნობებთ როცა მივიღებთ გადაწყვეტილებას.თუ რომელ კუთხეში მოხდება ფინანსების შემცირება.ჯერ გადაწყვეტილი არ გვაქვს",-განაცხადა ვახტანგ გომელაურმა.