აფხაზეთის ხელისუფლების წარმომადგენლებმა საქართველოს ერთიანობისთვის დაღუპულ გმირთა მემორიალი ყვავილებით შეამკეს და ტამიშის ბრძოლის დროს დაღუპული გმირების ხსოვნას კიდევ ერთხელ მიაგეს პატივი.

აფხაზეთში, დაბა ტამიშთან მოწინააღმდეგის მხრიდან საზღვაო დესანტის გადმოსხმის შედეგად გამართული ბრძოლის დაწყებიდან დღეს 24 წელი გავიდა.

გამთენიისას პირველი დარტყმა ტამიშში, ლაბრასა და ზემო კინდღში განლაგებულმა ქართულმა ნაწილებმა მიიღეს. დესანტთან ერთად, გააქტიურდა აფხაზური ფორმირება. მოწინააღმდეგემ ქართული შენაერთების ნაწილს ჩრდილოეთიდან შეუტია. შეტევა იმდენად მოულოდნელი იყო, რომ პოზიციაზე მყოფი ყველა ქართველი ჯარისკაცი ემსხვერპლა. პირველი დარტყმა დუშეთის ბატალიონმა მიიღო, რის შედეგადაც 52 ქართველი მებრძოლი დაიღუპა. ქართულმა მხარემ რამდენიმე დღიანი ბრძოლის შედეგად 300-მდე მებრძოლი დაკარგა. მიუხედავად დიდი დანაკარგისა, ქართველმა ჯარისკაცებმა დესანტის მოგერიება შეძლეს, პოზიციები შეინარჩუნეს და საზღვაო დესანტი მთლიანად გაანადგურეს.

აფხაზეთის ავტონომიური რესპუბლიკის მთავრობის ხელმძღვანელმა, ვახტანგ ყოლბაიამ ტამიშის ბრძოლის მიმდინარეობა გაიხსენა და აღნიშნა, რომ ყველაფერი უნდა გაკეთდეს იმისათვის, რათა მსგავსი რამ აღარ განმეორდეს და ქართულ-აფხაზური კონფლიქტი მშვიდობიანად მოგვარდეს.

„აფხაზეთის ომის წარსულ ქრონიკებში ტამიშის ბრძოლები ყველაზე მძიმე და ტრაგიკულია. 24 წელი გავიდა მას შემდეგ, რაც ოჩამჩირის რაიონის სოფელი ტამიში და მისი მომიჯნავე სოფლები სისხლისმღვრელი ბრძოლების ადგილად იქცა. ერთ კვირაზე მეტ ხანს ქართველი სამხედროები წინააღმდეგობას უწევდნენ ზღვიდან რუსეთის მიერ გადმოსხმულ, დესანტს. ყველაფერი კი 2 ივლისს დაიწყო.

სისხლისმღვრელი საბრძოლო მოქმედებები 10 დღეზე მეტ ხანს გაგრძელდა. ქართველმა სამხედროებმა უმაგალითო სიმამაცე გამოიჩინეს და დიდი დანაკარგის ფასად რუსებით, ჩრდილოკავკასიელი დაქირავებულებითა და აფხაზი მებრძოლებით დაკომპლექტებული ძლიერი და კარგად მომზადებული დესანტი მოიგერიეს.

ძალიან ბევრი მებრძოლი დაგვეღუპა იმ დღეებში, რომელთაც გამუდმებით ვიხსენებთ და დავტირით დღევანდელ დღეს. 2 ივლისს ყველანი ვფიქრობთ იმაზეც როგორი აუნაზღაურებელი მსხვერპლი გავიღეთ ძმათამკვლელ ომში, რომელსაც გამარჯვებული არა ჰყავს. აფხაზებიც და ქართველებიც დავმარცხდით მაშინ, როცა ერთმანეთზე იარაღი აღვმართეთ. ამ მემორიალზე ჩვენი სახელოვანი მებრძოლების გვარებია ამოტვიფრული. დარწმუნებული ვარ, დადგება ის დროც, როდესაც ომში დაღუპული ქართველების და აფხაზების გვარ-სახელებს ერთ საერთო სტელაზე ამოვტვიფრავთ. დღეს პატივს მივაგებთ ჩვენი მებრძოლების სამარადისო ხსოვნას. დიდი მადლობა მათ იმისთვის, რომ თავიანთ სამშობლოს შესწირეს ყველაზე ძვირფასი რაც გააჩნდათ, საკუთარი სიცოცხლე. მადლობა მინდა მოვახსენო ყველას, ვინც დღეს მობრძანდა, პატივი მიაგო ჩვენი სახელოვანი მებრძოლების ხსოვნას“. – განაცხადა ვახტანგ ყოლბაიამ.

(NS)

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

პოლიციამ ძარცვის, ქურდობისა და კომპიუტერული მონაცემის ხელყოფის ბრალდებით ოთხი არასრულწლოვანი დააკავა

თბილისში, ბინაში უცხო ქვეყნის მოქალაქე მოკლა და მიიმალა - შსს-მ 1 პირი დააკავა

Premium Machinery Armenia ქართულ-სომხური ბიზნესასოციაციის პრეზენტაციაზე

თიბისი ბიზნესის მხარდაჭერით, საქართველოში პირველი YouTube ბიზნესშოუ იწყება