კვირიკაშვილი: კახი კალაძის გამორჩეული კაპიტნის თვისებები ნამდვილად მნიშვნელოვანია, რომ ღირსეულ გამარჯვებას მივაღწიოთ

2016-06-08 20:32:54, 637 ნახვა

პოლიტიკა

კახი კალაძეს გააჩნია ძალიან კარგი ორგანიზატორული ნიჭი, მენეჯერული თვისებები და გამოცდილება, რაც ჩვენი პარტიისთვის ძალიან მნიშვნელოვანია, - ამის შესახებ საქართველოს პრემიერ-მინისტრმა გიორგი კვირიკაშვილმა „ქართული ოცნების“ საარჩევნო შტაბის ხელმძღვანელად კახა კალაძის წარდგენის შემდეგ განაცხადა.

როგორც პრემიერმა აღნიშნა, ქვეყანამ წინასაარჩევნო პერიოდი ღირსეულად უნდა გაიაროს და განამტკიცოს დემოკრატიის ის მაღალი სტანდარტი, რომელიც წინა არჩევნების დროს იყო ნაჩვენები.

„4 თვე გვაშორებს მომავალ საპარლამენტო არჩევნებს. ეს იქნება ძალიან მნიშვნელოვანი პერიოდი, რომელიც ჩვენ ღირსეულად უნდა გავიაროთ. ჩვენ კიდევ ერთხელ უნდა განვამტკიცოთ ის მაღალი დემოკრატიული სტანდარტი, რომელიც იქნა ნაჩვენები როგორც საპრეზიდენტო, ასევე ადგილობრივი არჩევნების დროს და არა თუ უნდა შევინარჩუნოთ, არამედ კიდევ უფრო უნდა გავაუმჯობესოთ.
სწორედ ამიტომ, მინდა დღეს წარმოგიდგინოთ ჩვენი საარჩევნო შტაბის უფროსი კახი კალაძე, რომელმაც არა ერთხელ დაამტკიცა, რომ მას გააჩნია ძალიან კარგი ორგანიზატორული ნიჭი, მენეჯერული თვისებები და გამოცდილება, რომელიც ასევე ძალიან მნიშვნელოვანი იქნება ჩვენი პარტიისთვის წინასაარჩევნო პერიოდის ღირსეულად ჩატარებისთვისა და გამარჯვების მოსაპოვებლად. კახი კალაძის გამორჩეული კაპიტნის თვისებები ნამდვილად ძალიან მნიშვნელოვანი იქნება, რომ ჩვენ მივაღწიოთ ღირსეულ გამარჯვებას, რაც თავისთავად საქართველოს გამარჯვებას ნიშნავს“, - განაცხადა გიორგი კვირიკაშვილმა.

ცნობისთვის, პარტია „ქართული ოცნება - დემოკრატიული საქართველოს“ საარჩევნო შტაბს ვიცე-პრემიერი, პარტიის გენერალური მდივანი კახი კალაძე უხელმძღვანელებს. კალაძე პრემიერმა ცოტა ხნის წინ, პარტიის ოფისში გამართულ ბრიფინგზე წარადგინა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან