საქართველოში ფრანგულ ინსტიტუტთან აქცია „მე ვარ შარლი“ გაიმართა

2015-01-08 20:31:08, 4590 ნახვა

პოლიტიკა

აღმაშენებლის გამზირზე, ფრანგულ ინსტიტუტთან აქცია სახელწოდებით „მე ვარ შარლი“ გაიმართა.
აქცია სოციალურ ქსელებში დაიგეგმა და დაალოებით ასამდე ადამიანი იყო შეკრებილი.
აქციის დაწყებისას, შეკრებილ საზოგადოებას საფრანგეთის ელჩმა საქართველოში რენო სალენსიმ მიმართა და აქციის მონაწილეებს ფრანგი ხალხისადმი სოლიდარობის გამოცხადებისთვის მადლობა გადაუხადა.
როგორც საფრანგეთის ელჩმა აღნიშნა, დიდი პატივია, როდესაც ქართველი ხალხი ამ მძიმე წუთებში ფრანგ ხალხს სოლიდარობას უცხადებს.
აქციაზე ცნობილი სახეები და პოლიტიკოსებიც იმყოფებოდნენ.
როგორც საპარლამენტო უმრავლესობის წევრმა თინა ხიდაშელმა ჟურნალისტებთან საუბრისას განაცხადა, ის ტრაგედია, რაც საფრანგეთში დატრიალდა, არა მხოლოდ ფრანგების, არამედ მთელი მსოფლიოს გამოწვევაა და საქართველო ტერორიზმის წინააღმდეგ ყოველთვის იბრძოლებს.
აქციის მონაწილეებმა საფრანგეთის ინსტიტუტთან ყვავილები მიიტანეს და ჟურნალ Charlie Hebdo-ს რედაქციაზე თავდასხმის დროს გარდაცვლილი 12 ადამიანის ხსოვნის პატივსაცემად სანთლები დაანთეს.
აქციის მონაწილეებს ასევე ტრანსფარანტები ეჭირათ წარწერით „"Je suis Charlie", (მე ვარ შარლი).