1-ელ ივნისს, ბავშვთა დაცვის საერთაშორისო დღეს თბილისის ზოოპარკში საქართველო-ფილიპინების მეგობრობის მინიპარკი „მაბუჰაი" იხსნება. პრეზენტაცია 13:00 საათზეა დაგეგმილი.

პარკის გახსნისა და ლენტის გაჭრის საზეიმო ცერემონიაში მონაწილეობას  მიიღებენ ქ. თბილისის მერი დავით ნარმანია, თბილისის ზოოპარკის დირექტორი ზურაბ გურიელიძე, საქართველოს საპატიო კონსული ფილიპინების რესპუბლიკაში ტელმო კუნანანი (Thelmo Cunanan Jr.), ფილიპინების რესპუბლიკის საპატიო კონსული საქართველოში ბ-ნი თეიმურაზ ჭიჭინაძე და ბათუმის საერთაშორისო საკონტეინერო ტერმინალის მმართველი დირექტორი  ნიკოლოზ გოგოლი.

„მაბუჰაი" საბავშვო მინიპარკია ღია ცის ქვეშ, სადაც პატარებისთვის ეკოლოგიურად სუფთა, ხის მასალისგან დამზადებული გასართობი ზონაა მოწყობილი სახლებით, კოშკურებით, სასრიალოებით, ქვიშის მოედნით, საძრომიალოებითა და მოტორიკის განმავითარებელი კონსტრუქციებით. მინიპარკით სარგებლობას ზოოპარკის დამთვალიერებლები უფასოდ შეძლებენ.

საქართველო-ფილიპინების მეგობრობის პარკის დაარსების ინიციატორები იყვნენ საქართველოს საპატიო კონსული ფილიპინების რესპუბლიკაში ტელმო კუნანანი და თბილისის ზოოპარკის დირექტორი ზურაბ გურიელიძე. პროექტი ბათუმის საერთაშორისო საკონტეინერო ტერმინალის (BICT) დაფინანსებით განხორციელდა. BICT _ უმსხვილესი ფილიპინური ინვესტორი საქართველოში ფილიპინური კომპანიის International Container Terminal Services Inc (ICTSI) შვილობილი კომპანიაა და საკონტეინერო ტერმინალის ოპერატორია ბათუმის საზღვაო ნავსადგურში.

„ახალი საბავშვო პარკი წყალდიდობის შედეგად დაზარალებული თბილისის ზოოპარკის განახლების სიმბოლო იქნება. პარკს სახელიც შესაბამისი შევურჩიეთ _ „მაბუჰაი" ფილიპინური სიტყვაა და დღეგრძელობას ნიშნავს. მოხარულნი ვართ, რომ ჩვენი ფილიპინელი მეგობრების დახმარებით, ქართველ ბავშვებს ზოოპარკში ექნებათ გასართობი კუთხე, სადაც დროს ხალისიანად, ჯანსაღად და სასარგებლოდ გაატარებენ. დიდ მადლობას ვუხდით ფილიპინურ მხარეს ამ საჩუქრისთვის", _ აცხადებს თბილისის ზოოპარკის დირექტორი ზურაბ გურიელიძე.  

კონსულ კუნანანის განცხადებით, თბილისის ზოოპარკთან თანამშრომლობა მომავალშიც გაგრძელდება _ „წლის ბოლომდე ფილიპინებიდან 2 ბადისებური პითონის ჩამოყვანას ვგეგმავთ, ასე რომ, ტერიტორიის კეთილმოწყობის გარდა, კოლექციის გამდიდრებაშიც შევიტანთ ჩვენს წვლილს".       
 

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

Politico - ევროკავშირი წლის ბოლომდე უკრაინისთვის 45 მილიარდი ევროს ოდენობის სესხის გამოყოფას გეგმავს.

პაპუაშვილი - იმაზე სამჯერ მეტი ადამიანი მონათლა გუშინ პატრიარქმა ზემო აჭარაში, ვიდრე თბილისში აქციაზე ვიხილეთ

სამადაშვილი - რუსების მოკავშირე ავტოკრატია დაემხო სერბეთში. რუსეთმა და ივანიშვილის რეჟიმმა კიდევ ერთი მოკავშირე დაკარგა

transparency international - ოცნება სულ მცირე 800 000 მოქალაქეს პოლიტიკური არჩევანის გარეშე დატოვებს