"მე ვხედავ ქვეყანას, ერს, რომელსაც აქვს ხედვა, იცის ხვალ, ზეგ რა უნდა გააკეთოს, ქვეყანას, რომელიც თავის ტერიტორიებს ომით არ გაამთლიანებს",-ამის შესახებ საქართველოს პრეზიდენტმა გიორგი მარგველაშვილმა რიყის პარკში განაცხადა, სადაც ევროპის დღეები საზეიმოდ გაიხსნა.

მისივე მტკიცებით, საქართველო  ევროპული ერი  აუცილებლად  გახდება:

"2016 წელი  ევროპული სახელმწიფოს წლად გამოვაცხადეთ. ეს გავაკეთეთ იმიტომ, რომ  ამ წელს მოხდება ძალიან მნიშვნელოვანი ნაბიჯების გადადგმა ჩვენი ახალი სახელმწიფოებრიობის თვალსაზრისით. 25 წლის წინ, ჩვენ ერთად ვიდექით იმისათვის, რომ  დამოუკიდებელი   სახელმწიფო შექმნილიყო,  ბევრად უფრო რთულ ვითარებაში- საბჭოთა კავშირში. ჩვენ ეს ერთად შევძელით. დღეს კიდევ ერთი მნიშვნელოვანი ნაბიჯი  უნდა გადავდგათ   დამოუკიდებლობიდან  თავისუფლებისკენ. თავისუფლებისკენ ნაბიჯის გადადგმა ნიშნავს არა მარტო იმას, რომ  ვიღაცას გაემიჯნები, არამედ ეს ნიშნავს იმას, რომ  შენ შექმნი შენსას, უნიკალურს, განსაკუთრებულს, თანამედროვეს, ისეთს, როგორიც შენ გინდა,  როგორიც შენს წინაპრებს უნდოდა, როგორიც შენს შთამომავლებს ენდომება. ამ თვალსაზრისით, ჩვენ დღეს ახალ ნაბიჯს ვდგამთ ევროპული  საქართველოს შექმნის კუთხით.   მე ვხედავ ქვეყანას, ერს, რომელსაც აქვს ხედვა, რომელმაც  იცის ხვალ, ზეგ რა უნდა გააკეთოს. ქვეყანას, რომელიც თავის ტერიტორიებს გაამთლიანებს არა ომით, არამედ იმით, რომ განსაკუთრებულ  ქვეყანას, თავისუფლებას შექმნის აქ. აი ასე მეგობრობით, ერთად დგომით, წინ სვლით, ჩვენ შევძლებთ და  გავხდებით ევროპული ერი და ამას წელს განსაკუთრებით დავამტკიცებთ, რადგან ყველა თქვენთაგანი მივა არჩევნებზე და გადაწყვეტს ქვეყნის მომავალს. გაუმარჯოს ევროპულ საქართველოს და ღმერთი ფარავდეს მას",-განაცხადა გიორგი მარგველაშვილმა რიყის პარკში სიტყვით გამოსვლისას.

ევროპის დღეების ფარგლებში, 3 კვირის განმავლობაში,  უამრავი  საინტერესო  ღონისძიება გაიმართება, რომლებზე დასწრებაც  ნებისმიერ მსურველს შეეძლება.

ღონისძება საქართველოს ყველა მოქალაქეს  ევროპული გზისა და არჩევანის მნიშვნელობას კიდევ ერთხელ შეახსენებს.

დღეს  სტარტი აიღეო ევროპულმა სოფელმა, სადაც ევროკავშირის  წევრი სახელმწიფოების  საელჩოების ორგანიზებით მოეწყო 28 წევრი ქვეყნის კუთხეები. თითოეული მათგანი  წარმოადგენს საკუთარი ქვეყნის  კერძებს,  ეროვნულ სამოსსა და სხვა ტრადიციებს. მათ შორისაა  ნატო-სა და  ევროკავშირის შესახებ საინფორმაციო  ცენტრის კუთხეც. იმართება კონცერტი, რომელშიც  მონაწილეობას მიიღებენ ევროვიზიის ვარსკვლავები, მოძრაობის თეატრი. ყველა ეს ღონისძიება  კიდევ ერთხელ წარმოაჩენს, რომ  ერთიანობა მრავალფეროვნებაშია.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

კობახიძემ თქვა, რომ რუბიოსთან დახურულ თემეზე ისაუბრა

მიხეილ სააკაშვილი: სპონტანური საპროტესტო აქციები რეჟიმისთვის ყველაზე დიდ საფრთხეს წარმოადგენდა

ენმ-ის თავმჯდომარე: ოპოზიციურ ალიანსში გაწევრიანების გადაწყვეტილება სააკაშვილის ინიციატივით იქნა მიღებული

კობახიძე - მდინარაძეს ექნება გამორჩეული როლი სახელმწიფოებრივი გადაწყვეტილების მიღების პროცესში