2016-04-25 13:37:08, 847 ნახვა

---

დასაქმების ხელშეწყობა - "ვისოლ ჯგუფსა" და ჯანდაცვის სამინისტროს შორის ურთიერთანამშრომლობის მემორანდუმი გაფორმდა

შრომის, ჯანმრთელობისა და სოციალური დაცვის სამინისტროსა  და "ვისოლ ჯგუფს" შორის ურთიერთთანამშრომლობის  მემორანდუმი  გაფორმდა.

დოკუმენტს ხელი შრომის, ჯანმრთელობისა და სოციალური დაცვის  მინისტრმა დავით სერგეენკომ  და "ვისოლ ჯგუფის" პრეზიდენტმა სოსო  ფხაკაძემ მოაწერეს. ხელმოწერის  ცერემონია "ვისოლ ჯგუფის"  კომპანიაში შედგა.

მემორანდუმის მიზანია, სახელწმიფო და კერძო სექტორს შორის თანამშრომლობის გზით  დასაქმების ხელშწყობა. კერძოდ, სამინისტროს  სოციალური მომსახურების სააგენტოს  შრომის ბაზრის  მართვის საინფორმაციო სისტემაში (www.worknet.gov.ge) რეგისტრირებული  სამუშაოს  მაძიებლების  სტაჟირება.

მხარეები უზრუნველყოფენ  დასაქმების  ხელშეწყობის  საკითხებზე  ერთობლივი  ღონისძიებების  გატარებას, ასევე შრომის ბაზარზე  მოთხოვნადი პროფესიების  შესახებ  ინფორმაციის ურთიერთგაცვლას.

მინისტრ დავით სერგეენკოს განცხადებით, მნიშვნელოვანია, რომ " ვისოლ ჯგუფი"  თავისი მძლავრი, მარავლფეროვანი და მრავალმხრივი ინდუსტრიით, მონაწილებას მიიღებს ქვეყნისათვის ყველაზე უფრო პრიორიტეტული პრობლემის მოგვარებაში-სამუშაო ადგილების მიწოდებაში.

"დღეს საფუძველი ჩაეყარა კიდევ ერთ თანამშრომლობას, რომელიც თავისი შინაარსით, ფორმატით არის კერძო და სახელწმიფო პარტნიორობის ბრწყინვალე მაგალითი. დეტალები ამ ხელშეკრულების არის ის, რომ "ვისოლ ჯგუფი" იმ თავისი მძლავრი, მარავლფეროვანი და მრავალმხრივი ინდუსტრიით, მონაწილებას მიიღებს ქვეყნისათვის ყველაზე უფრო პრიორიტეტული პრობლემის მოგვარებაში-სამუშაო ადგილების მიწოდებაში. ამ მხრივ მნიშვნელოვანია არა მარტო საკუთრივ ადამიანების დასაქმება, "ვისოლ ჯგუფი" ჩვენთან ითანამშრომლებს, როგორც სამუშაოს მაძიებელთა ინფორმაციიის გაცვლის მხრივ, ასევე დასაქმების პოლიტიკაში თანამშრომლობით და ასევე გადამზადებით იმ ადამიანების, რომელ პროფესიაზეც მოთხოვნაა კერძო სექტორში და "ვისოლ ჯგუფი"  ამ ადამიანებს მხარს დაუჭერს. ვფიქრობ, ამ თანამშრომლობას დიდი პერსპექტივა აქვს და მადლობას ვუხდი "ვისოლ ჯგუფს" ამ მართლაც სახელწმიფოებრივი ნაბიჯისათვის", - განაცხადა დავით სერგეენკომ.

"ვისოლ ჯგუფის" პრეზიდენტის სოსო ფხაკაძის თქმით, მათთვის  ძალიან ღირებულია ისეთ წარმატებულ სამინისტროსთან თანამშრომლობა, როგორიც  შრომის, ჯანმრთელობისა და სოციალური დაცვის სამინისტროა.

" ვფიქრობ, დღეს ძალიან საინტერესო და მნიშვნელოვან  მემორანდუმს მოვაწერეთ  ხელი. ჩვენს კომპანიაში დაახლოებით 5 000 ადამიანი ერთიანდება და ძალიან მრავლფეროვანია ის პროფესიები, რომლებიც ჩვენ გვჭირდება ყოველდღიურად და ყოველწლიურად. ამ მხრივ, ვფიქრობ, ძალიან ეფექტური იქნება თანამშრომლობა ჩვენსა და სამინისტროს შორის. ჩვენ პულსზე გვიდევს ხელი, ვიცით შრომის ბაზარზე, რა პროფესიებზე არის მოთხოვნა. მოხდება ამ ინფორმაციის გაცვლა და საბოლოო ჯამში, ერთ ძალიან ნიშვნელოვან რამეს ჩავუყრით საფუძველს, რომ რაც შეიძლება მეტი ადამიანი იყოს დასაქმებული და უნივერსიტეტის, თუ კოლეჯის კედლებიდანვე,  სასკოლო დაწესებულებიდან სანამ გამოვლენ ახალგაზრდები, მათ უკვე  უნდა იცოდნენ, რომ მათ შეეძლებათ სამსახურის შოვნა, რამეთუ  ისინი ისწავლიან, დაეუფლებიან იმ უნარ-ჩვევებს, პროფესიას,  რომელზეც იქნება შრომის ბაზარზე მოთხოვნილება და ამ პროცესში ჩვენ, როგორც ერთ-ერთი კერძო კომპანია, წვლილს შევიტანთ და დარწმუნებული ვარ, სხვა კერძო კომპანიებიც აგვიბამენ მხარს",-აღნიშნა  სოსო ფხაკაძემ.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი