ახალი შეზღუდვა რუსეთისთვის - ევროკავშირის სანქციები 1600-მდე ფიზიკურ და იურიდიულ პირს შეეხო

2026-10-12 17:26:57, 2679 ნახვა

მსოფლიო

უკრაინის წინააღმდეგ რუსეთის სრულმასშტაბიანი ომის გამო ევროკავშირმა მოსკოვის საწინააღმდეგო სანქციები გააფართოვა. ბრიუსელის სანქციებმა დამატებით 1600-მდე ფიზიკური და იურიდიული პირი მოიცვა.

ევროკავშირის წევრი სახელმწიფოების საგარეო საქმეთა მინისტრების საბჭოს მიერ 12 ოქტომბერს, ლუქსემბურგში დადასტურებული გადაწყვეტილების შემდეგ ევროკავშირის უმაღლესმა წარმომადგენელმა საგარეო და უსაფრთხოების პოლიტიკის საკითხებში კაია კალასმა განაცხადა, რომ ეს დასანქცირებულთა სიის ყველაზე მასშტაბური გაფართოებაა უკრაინაში ომის დაწყების შემდეგ.

1600-მდე ფიზიკური და იურიდიული პირიდან ნახევარზე მეტს კავშირი აქვს რუსული ბალისტიკური რაკეტების წარმოებასთან.

ჩამონათვალი ევროკავშირის ოფიციალურ ჟურნალში გამოქვეყნდება.

ლუქსემბურგში საგარეო საქმეთა მინისტრების სხდომამდე რამდენიმე დღით ადრე, 7 ოქტომბერს, სანქციების სიის გაფართოებაზე შეთანხმდნენ ევროკავშირში მისი წევრი სახელმწიფოების მუდმივი წარმომადგენლები.

ევროკავშირის სანქციები ნიშნავს აქტივების გაყინვას, ეკონომიკური ურთიერთობებისა და მომსახურების აკრძალვას. ფიზიკურ პირებს ეკრძალებათ ევროკავშირის ტერიტორიაზე შესვლაც.

Patreon P მხარი დაუჭირე "ექსპრესნიუსს" →

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან