მიხეილ ყაველაშვილის მიერ შეწყალებულ პატიმრებს შორის 2024 წლის ნოემბერ-დეკემბრის პროევროპული აქციების მონაწილეები და 2025 წლის 4 ოქტომბრის საქმეზე დაკავებული დემონსტრანტები არიან.

არსებული ინფორმაციით, „ქართული ოცნების“ მიერ მეექვსე პრეზიდენტად არჩეულმა ყაველაშვილმა შეიწყალა:

საბა ჯიქია,
დავით ხომერიკი,
თორნიკე მჭედლიშვილი,
ფრიდონ ბუბუტეიშვილი,
დანიელ მუმლაძე,
გურამ ხუტაშვილი,
ავთანდილ თოფჩიშვილი,
სიმონ მახარაძე.
ინფორმაციას ადასტურებენ მათი ადვოკატები.

ამ ეტაპზე უცნობია, გათავისუფლებული დემონსტრანტებიდან ყველას ჰქონდა თუ არა მიმართული პრეზიდენტისთვის შეწყალების თხოვნით.

18 წლის სტუდენტი საბა ჯიქია პოლიციელზე თავდასხმის ბრალდებით 2024 წლის 5 დეკემბერს დააკავეს. პროკურატურა მას 2024 წლის 30 ნოემბერს რუსთაველის გამზირზე მიმდინარე საპროტესტო აქციაზე პოლიციელისთვის წიხლის ჩარტყმას ედავებოდა. 2025 წლის 10 ივლისს მოსამართლე თამარ მჭედლიშვილმა მას 4 წლითა და 6 თვით პატიმრობა მიესაჯა.

• დავით ხომერიკი 2024 წლის 2 დეკემბერს თამარაშვილის ქუჩაზე, ძმასთან, ზუკასთან ერთად დააკავეს. პოლიციის მტკიცებით, ისინი გზას ხელოვნურად კეტავდნენ და მათ მოთხოვნას არ დაემორჩილნენ. გამოძიების მასალების თანახმად, ადმინისტრაციული წესით დაკავების შემდეგ დავითი და მისი ძმა გაჩხრიკეს და სწორედ მაშინ იპოვეს დავითის ზურგჩანთაში „მოლოტოვის კოქტეილები“. საქმე გადაკვალიფიცირდა და ის ცეცხლის წაკიდების მომზადებაში დაადანაშაულეს. ხომერიკს 4 წლით და 6 თვით პატიმრობა მიესაჯა.

• სიმონ მახარაძე და ავთანდილ თოფჩიშვილი 4 ოქტომბრის ე.წ. მშვიდობიანი დამხობის საქმეზე დააკავეს. მათ ბრალად სტრატეგიული ობიექტის ხელში ჩაგდების მცდელობა და ჯგუფური ძალადობა ედებოდათ. მათთან გაფორმებული საპროცესო შეთანხმების მიხედვით, სასჯელის სახედ განესაზღვრათ 1 წლით პატიმრობა და 3 წლით პირობითი მსჯავრი.

• თორნიკე მჭედლიშვილს 4 ოქტომბრის საქმეზე 5 წლით პატიმრობა ჰქონდა მისჯილი.
• დანიელ მუმლაძემ და გურამ ხუტაშვილს - 3-3 წლით პატიმრობა მიუსაჯეს რუსთაველის გამზირზე მდებარე სათვალთვალო კამერების ჯგუფურად დაზიანებისთვის.

• ფრიდონ ბუბუტეიშვილს ბრალად ედებოდა ქვის სროლით მეხანძრე-მაშველის დაშავება და პარლამენტის ჭიშკრის დაზიანება 2024 წლის 1 მაისს, „აგენტების კანონის“ საწინააღმდეგო აქციის მიმდინარეობის დროს. მას 5 წლით თავისუფლების აღკვეთა მიესაჯა.

მიხეილ ყაველაშვილმა 27 აგვისტოს, მარიამობის დღესასწაულთან დაკავშირებით 226 ადამიანი შეიწყალა. შეწყალების აქტი შეეხო 217 საპატიმრო და 6 არასაპატიმრო სასჯელის მქონე პირს, ხოლო 3 პირს ნასამართლობა მოეხსნა.

ავტორი: ელენე გვიმრაძე, ექსპრესნიუსის რეპორტიორი 2018 წლიდან

სოციალური ქსელები

თურქ მომღერალ ილიას იალჩინტაშს ნარკოტიკებთან დაკავშირებულ საქმეში მინიმუმ 10 წლით თავისუფლების აღკვეთა ემუქრება

ზელენსკიმ აშშ-სა და რუსეთს შორის შესაძლო დაახლოებას „ისტორიული შეცდომა“ უწოდა

საფრანგეთში არეულობის დროს დაახლოებით 1800 ადამიანი დააკავეს, ხოლო სასწრაფო დახმარების 500-ზე მეტი თანამშრომელი დაშავდა

ალბანეთში პრემიერ-მინისტრის გადადგომის მოთხოვნით საპროტესტო აქციები გრძელდება, პოლიცია კი რეზინის ტყვიებს იყენებს