მარეგულირებელი კომისიის მიერ "ტვ პირველისთვის" დაკისრებული  სანქციის გამო, ევროსაბჭომ  განგაში გამოაცხადა. მასალა ჟურნალისტების ევროპულმა ფედერაციამ მოამზადა.

ორგანიზაცია აღნიშნავს, რომ კომისიის გადაწყვეტილება 2025 წელს „მაუწყებლობის შესახებ“ კანონში შეტანილი ცვლილებების შემდეგ მიღებულ სანქციებს უკავშირდება, რომლებმაც GNCC-ს იმ საკითხების განხილვის უფლებამოსილება მისცა, რომლებიც მანამდე თვითრეგულირების მექანიზმის ფარგლებში წყდებოდა.

"2026 წლის 25 ივნისს საქართველოს კომუნიკაციების ეროვნულმა კომისიამ (GNCC) ტელეკომპანია „TV პირველს“ 2 500 ლარის (830 ევრო) ოდენობის ჯარიმა დააკისრა. კომისიის განმარტებით, მაუწყებელმა დაარღვია „მაუწყებლობის შესახებ“ კანონის მოთხოვნები, რომლებიც სარედაქციო სტანდარტებს, სამართლიანობისა და მიუკერძოებლობის პრინციპებს უკავშირდება. გადაწყვეტილებაში ასევე საუბარია სარედაქციო დამოუკიდებლობის ფარგლებში გამოხატვის თავისუფლების განხორციელებაზე.

გადაწყვეტილებას წინ უძღოდა მედია მომსახურებების რეგულირების დეპარტამენტის მიერ „TV პირველის“ 11-13 მაისის საინფორმაციო გამოშვებების მონიტორინგი. კომისიამ 11:00, 15:00 და 20:00 საათზე გასულ გადაცემებში რამდენიმე დარღვევა დააფიქსირა.

GNCC-ის შეფასებით, მაუწყებლის სიუჟეტებში მიმდინარე პოლიტიკური საკითხები ისე იყო წარმოდგენილი, რომ „TV პირველის“ პირად დამოკიდებულებასა და მოსაზრებას ასახავდა. მედიის ცნობით, სადავო გამონათქვამებს შორის იყო „სინდისის პატიმრები“ — ტერმინი, რომელსაც ხელისუფლების კრიტიკოსები მთავრობის წინააღმდეგ გამართული აქციების დროს დაკავებულ პირებთან მიმართებით იყენებენ; „ოლიგარქი“ — ტერმინი, რომელიც „ქართული ოცნების“ დამფუძნებლის, ბიძინა ივანიშვილის მისამართით გამოიყენება; ასევე ფრაზა: „რას ამბობენ „ქართული ოცნების“ რიგითი წევრები, ამას დიდი მნიშვნელობა არ აქვს, რადგან პრაქტიკა აჩვენებს, რომ საბოლოოდ ყველაფერი ისე მოხდება, როგორც ბიძინა ივანიშვილი იტყვის“.

კომისიამ დაადგინა, რომ მსგავსი გამონათქვამების გამოყენება საინფორმაციო პროგრამებში არღვევს „მაუწყებლობის შესახებ“ კანონის 54-ე მუხლის მეხუთე პუნქტით განსაზღვრულ სამართლიანობისა და მიუკერძოებლობის პრინციპებს.

21 მაისს GNCC-მა მსგავსი საკითხის მონიტორინგის საფუძველზე „TV პირველი“ უკვე დაასანქცირა, ასევე სანქცია დაეკისრათ „ფორმულას“, „პოსტკივისა“ და „იმედს“. 2025 წლის ივნისში, „ქართული ოცნების“ წევრების საჩივრების საფუძველზე, კომისიამ „TV პირველი“ და „ფორმულა“ საინფორმაციო პროგრამებში მიუკერძოებლობის პრინციპის დარღვევაში ცნო. ეს საკითხი მედიის თავისუფლების პლატფორმის სხვა გაფრთხილებაშიც არის განხილული.

2025 წელს მიღებული „მაუწყებლობის შესახებ“ კანონში შესული ცვლილებებით GNCC-ს მიენიჭა უფლებამოსილება, განიხილოს საკითხები, რომლებიც მანამდე თვითრეგულირების მექანიზმის ფარგლებში წყდებოდა. ცვლილებების თანახმად, თუ კომისია მაუწყებლის მხრიდან ერთსა და იმავე ტიპის დარღვევას ორჯერ დაადგენს, მას შეუძლია დაიწყოს პროცედურა მაუწყებლის ლიცენზიის ან ავტორიზაციის შეჩერების მიზნით.

ყოფილი „ქართული ოცნების“ დეპუტატი გოგა გულორდავა GNCC-ის თავმჯდომარედ 2026 წლის იანვარში აირჩიეს, - ნათქვამია ინფორმაციაში. 

ავტორი: ექსპრესნიუსი,

სოციალური ქსელები

საერთაშორისო გამჭვირვალობა - - ვახო სანაია ისჯება ბიძინა ივანიშვილისა და „ქართული ოცნების“ რეჟიმის მხილების, პრინციპული პოზიციისა და საქართველოს ევროპული მომავლისთვის ბრძოლის გამო

ზურაბიშვილი ვახო სანაიაზე - საქართველო მოსკოვის სცენარს სიტყვასიტყვით იმეორებს

საქართველოს ექსპორტი $6.1 მილიარდამდე გაიზარდა - პირველ ადგილზეა მსუბუქი ავტომობილები

ჟურნალისტ ვახო სანაიას სოციალურ ქსელში დაწერილი პოსტის გამო 30-დღიანი პატიმრობა შეუფარდეს