2026-06-04 11:48:22, 3855 ნახვა

---

დუმილი პარლამენტში და 345 000 ლარი ოცნებას- რის სანაცვლოდ იღებს ყოფილი დეპუტატი 5,491 ბინის მშენებლობის ნებართვას -TI-ის ანგარიში

„საერთაშორისო გამჭვირვალობა – საქართველომ“ ანგარიში გამოაქვეყნა, რომლის მიხედვითაც, ყოფილი დეპუტატი იაშა შერვაშიძე და მისი ბიზნესპარტნიორები  „ქართულ ოცნებას“ ჯამში 345 000 ლარს სწირავდნენ, პარალელურად კი ბათუმში სახელმწიფო ქონებას იღებდნენ და მსხვილ სამშენებლო პროექტებს იწყებდნენ.

ორგანიზაციის ინფორმაციით, პარტიისთვის განხორციელებული შემოწირულობების პერიოდი ემთხვევა იმ დროს, როდესაც შერვაშიძესთან დაკავშირებულმა კომპანიებმა ბათუმში სახელმწიფო მიწის ნაკვეთები უკონკურენტო წესით მიიღეს.

ყოფილმა პარლამენტარმა, იაშა შერვაშიძემ, მისმა ბიზნესპარტნიორებმა და ოჯახის წევრებმა, „ქართულ ოცნებას” და „ქართული ოცნების” მხარდაჭერილ საპრეზიდენტო კანდიდატს, სალომე ზურაბიშვილს, ჯამში 345,000 ლარი შესწირეს. იაშა შერვაშიძე, 2008-2012 წლებში, ქედის რაიონის მაჟორიტარი დეპუტატი იყო საქართველოს პარლამენტში, პარტია „ერთიანი ნაციონალური მოძრაობიდან“. ის, 2012 წელს კვლავ აირჩიეს ქედის მაჟორიტარ დეპუტატად “ნაციონალური მოძრაობიდან”, მაგრამ ხელისუფლების ცვლილებისთანავე, დაპორტირდა „ქართულ ოცნებაში“. მას დეპუტატობისას არც საკანონმდებლო ინიციატივაზე უმუშავია და არც სიტყვით გამოსვლის უფლებით უსარგებლია. სამაგიეროდ, მან და მისმა ოჯახის წევრებმა, დეპუტატობის პერიოდში და შემდეგაც, განავითარეს საკუთარი ბიზნესი, ფლობენ 11 კომპანიის წილებს ან ხელმძღვანელობენ მათ. აქედან  3 სამშენებლო კომპანიაა.

• შპს „ჯიი XXI-ში“, იაშა შერვაშიძის და მისი ოჯახის წევრის ბიზნესპარტნიორი, კომპანიის დაფუძნებიდან, 2010 წლის 14 სექტემბრიდან, 2020 წლის 10 ივლისამდე, იყო ბათუმის მუნიციპალიტეტის ყოფილი ვიცე-მერი, ჯაბა ტუღუში, რომელმაც საკუთარი 10-%იანი წილი უსასყიდლოდ აჩუქა მამას, გაბრიელ ტუღუშს. ჯაბა ტუღუში ვიცე-მერის თანამდებობაზე მუშაობდა 2019 წლის 25 ოქტომბრიდან 2020 წლის 15 ივლისამდე, ხოლო 2018 წლის 1 თებერვლიდან 2019 წლის 25 ოქტომბრამდე ბათუმის მუნიციპალიტეტის მერიის საინვესტიციო პოლიტიკისა და საგრანტო პროგრამების მართვის განყოფილების უფროსი და ბათუმის მერის მრჩეველი იყო მუნიციპალური ინფრასტრუქტურის რეაბილიტაციის საკითხებში. შპს „ჯიი XXI-მ“ ბათუმში, ახალი ბულვარის მიმდებარედ, იუსუფ კობალაძის ქუჩა #8ა-ში, 2012 წელს დაიწყო 24 სართულიანი მრავალფუნქციური 960-ბინიანი კომპლექსის მშენებლობა, რომელიც ექსპლუატაციაში მიიღეს 2019 წელს;
• შპს „მტზ-კომპანი“ 2018 წლის 1 თებერვალს იაშა შერვაშიძის მეუღლემ, ზინა ტურაშვილმა დააფუძნა და 2020 წლის 10 აგვისტომდე ხელმძღვანელობდა მას. შემდეგ  ამ კომპანიის დირექტორი იაშა შერვაშიძე იყო. შპს „მტზ-კომპანიმ“, ბათუმში, ჟიული შარტავას გამზირის #27-ში, ცენტრალური საფეხბურთო სტადიონის მიმდებარედ, 1,947 კვ.მ მიწის ნაკვეთზე, 2022 წლის 15 მარტს დაიწყო 20-სართულიანი საცხოვრებელი სახლის მშენებლობა, რომელიც შედგება 4 შენობა-ნაგებობისგან და მოიცავს 285 საცხოვრებელ ბინას, კომერციულ ფართებს, გასართობ ობიექტებს და სხვა საზოგადოებრივ დაწესებულებებს. ეს შენობა-ნაგებობები ექპსლუატაციაში მიიღეს 2025 წლის 6 ივნისს და მისი საერთო ფართობი შეადგენს 19,571 კვ.მ.
• შპს „ს ი ე ლ ჰოლდინგი“, 2025 წლის 7 აგვისტოს, დააფუძნა შპს „მტზ-კომპანი-მ“ და შპს „ხახუტამ“. მას ხელმძღვანელობს იაშა შერვაშიძე. იაშა შერვაშიძე ასევე ხელმძღვანელობს ორივე დამფუძნებელ კომპანიას, ხოლო შპს „მტზ-კომპანის“ 100%-იან წილს მისი მეუღლე, ზინა ტურაშვილი ფლობს და შპს „ხახუტას“ 100%-იან წილს - მისი შვილი, ლევან შერვაშიძე. შპს „ს ი ე ლ ჰოლდინგს“ ბათუმში, ჟიული შარტავას გამზირის #25-ს, გენერალ ასლან აბაშიძის ქუჩა #16-ს და პეტრე ბაგრატიონის ქუჩა #133ა-ს და ჟიული შარტავას გამზირის #21-ს შორის, ბათუმის ცენტრალური სტადიონის მიმდებარედ, საკუთრებაში გააჩნია 30,685 კვ.მ არასასოფლო-სამეურნეო დანიშნულების მიწის ნაკვეთი, მასზე განთავსებული ნაგებობებით. მათ ადგილას იაშა შერვაშიძე აშენებს 8 მრავალბინიან საცხოვრებელ სახლს, საიდანაც 6 სახლი იქნება 33 სართულიანი, 106 მეტრი სიმაღლით, ხოლო 2 სახლი - 30 სართულიანი. საბოლოოდ აშენდება 370,375 კვ.მ საერთო ფართობის მქონე შენობა-ნაგებობები, სადაც განთავსდება 4,246 ბინა, კომერციულ ფართები, გასართობი ობიექტები და სხვა საზოგადოებრივი დაწესებულებები. საყურადღებოა, რომ ამ სამშენებლო ტერიტორიის ნაწილი, 922 კვ.მ მიწის ნაკვეთი, იაშა შერვაშიძის დეპუტატობის დროს, 2014 წლის სექტემბერში, სახელმწიფო ქონების ეროვნული სააგენტოს მიერ ჩატარებულ ელექტრონულ აუქციონში, უკონკურენტოდ, 170,000 ლარად, მოიგო შპს „ხახუტამ“.

აღსანიშნავია, რომ იაშა შერვაშიძის და მისი ბიზნესპარტნიორების მიერ „ქართული ოცნების“ სასარგებლოდ გაღებული შეწირულებები ემთხვევა სამშენებლო სამუშაოების წარმოების პერიოდს.

 

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი