აშშ-ის პრეზიდენტმა დონალდ ტრამპმა ვენესუელასა და მიმდებარე ტერიტორიებზე საჰაერო სივრცის სრული დახურვის შესახებ განაცხადა. მან განცხადება სოციალურ ქსელში, Truth Social-ზე გამოაქვეყნა. „ყველა ავიაკომპანიას, პილოტს, ნარკოდილერს და ადამიანებით მოვაჭრეს: გთხოვთ, ვენესუელას თავზე და მის გარშემო არსებული საჰაერო სივრცე სრულად დახურულად ჩათვალოთ“, - დაწერა მან.

23 ნოემბერს, Reuters-მა, აშშ-ის ოფიციალურ პირებზე დაყრდნობით, გაავრცელა ინფორმაცია, რომ აშშ მზად იყო ვენესუელას წინააღმდეგ ოპერაციების ახალი ფაზის დასაწყებად „უახლოეს დღეებში“. სააგენტოს ერთ-ერთმა წყარომ აღნიშნა, რომ ტრამპი „მზად იყო გამოიყენოს ამერიკის ყველა არსებული ძალა“ ნარკოტიკებით ვაჭრობის წინააღმდეგ საბრძოლველად. ერთი დღით ადრე, აშშ-ის ფედერალურმა ავიაციის ადმინისტრაციამ (FAA) გააფრთხილა, რომ სიფრთხილე გამოიჩინონ მაიკეტიის აეროპორტთან ახლოს ფრენისას სამხედრო აქტივობის გაზრდის გამო. გაფრთხილება ძალაშია 2026 წლის 19 თებერვლამდე.

TASS-ის წყაროები იუწყებიან, რომ ესპანეთისა და პორტუგალიის ავიაციის ხელისუფლებამ ურჩია მათი ქვეყნების სამგზავრო ავიაკომპანიებს, უახლოეს დღეებში ვენესუელას საჰაერო სივრცეში ფრენები არ განახორციელონ.

აგვისტოდან მოყოლებული, რეგიონში აშშ-ის სამხედრო აქტივობა გაძლიერდა. სწორედ მაშინ, როდესაც ტრამპმა ხელი მოაწერა დირექტივას, რომელიც პენტაგონს ლათინური ამერიკის ნარკოკარტელების წინააღმდეგ ძალის გამოყენების უფლებას აძლევდა, იტყობინება The New York Times. „Wall Street Journal“-მა აღნიშნა, რომ აშშ-ის ადმინისტრაციამ ვენესუელაში არაერთი სამიზნე გამოავლინა, მათ შორის ნარკოტიკებით ვაჭრობასთან დაკავშირებული აეროდრომები და საზღვაო პორტები.

ვენესუელა საპასუხო ზომებს იღებს. „როიტერის“ ცნობით, ვენესუელის სამხედროები პარტიზანული ომისთვის დანაყოფებს ამზადებენ, ხოლო მოსახლეობამ იარაღის მიღება დაიწყო. „Washington Post“-მა გაავრცელა ინფორმაცია, რომ კარაკასმა მოსკოვს საზენიტო-სარაკეტო სისტემების მიწოდებისა და სამხედრო ტექნიკის შეკეთების თხოვნით მიმართა.

„The Atlantic“-ის ცნობით, ნიკოლას მადურო მზადაა გადადგეს იმ პირობით, რომ მას და მის თანამოაზრეებს ამნისტია და ქვეყნიდან უსაფრთხო გასვლის გარანტია მიეცემათ. წყაროებზე დაყრდნობით, „Politico“-მ აღნიშნა, რომ ვაშინგტონი განიხილავს მადუროს რუსეთში, თურქეთში, აზერბაიჯანში ან კუბაში გამგზავრების ნებართვის მიცემას, თუმცა თეთრ სახლში ზოგიერთი მის დაპატიმრებას და ამერიკულ სამართალდამცავ ორგანოებს ემხრობა.

ავტორი: ექსპრესნიუსი,

სოციალური ქსელები

ვენსმა უარი თქვა ნეთანიაჰუს მხარდაჭერაზე არჩევნებში, ტრამპის მხარდაჭერის მიუხედავად

ოსლოში შეხვედრაზე ვიტკოფი ზელენსკის თხოვს დათმოს უკრაინის ტერიტორიები პუტინისთვის - The New York Times

ევროპის საბჭოს გენერალური მდივანი - ევროპა ოპოზიციის აკრძალვის შესახებ მოსმენების წინ, დააკვირდება ყველა მოქალაქის ფუნდამენტური უფლებებისა და თავისუფლებების დაცვას

დიდი ბრიტანეთი საუდის არაბეთში ჰუსიტების თავდასხმებისგან დასაცავად Typhoon-ის გამანადგურებლებს გაგზავნის