იუსტიციის სახლში ერთიანი სავაჭრო ქსელის პროექტთან დაკავშირებით შექმნილი საკოორდინაციო კომიტეტის სხდომა გაიმართა. შეხვედრას იუსტიციის მინისტრი თეა წულუკიანი ხელმძღვანელობდა.

ერთიანი სავაჭრო ქსელი (TFS) საქართველოს სახელმწიფო და კერძო სექტორის ურთიერთთანამშრომლობის წარმატებული მაგალითია. ქსელი ინფორმაციის ელექტრონულად გაცვლის სისტემაა, რომელშიც ტრანსპორტისა და ლოჯისტიკის სფეროში მომუშავე ორგანიზაციები არიან ჩართულნი.

სისტემის საშუალებით სავაჭრო ოპერაციების მონაწილე კომპანიები მსოფლიოს ნებისმიერი წერტილიდან საერთო ვებპორტალის მეშვეობით ონლაინრეჟიმში აწარმოებენ ყველა იმ ოპერაციას, რომლებიც საქართველოში და საქართველოს გავლით ტვირთების გადაზიდვასთანაა დაკავშირებული. სისტემაში ჩართული კომპანიები გადაზიდვებისათვის საჭირო დოკუმენტაციას ელექტრონულ რეჟიმში ავტომატურად ცვლიან, რაც მნიშვნელოვნად ამარტივებს პროცედურას, ამცირებს ფინანსურ და დროსთან დაკავშირებულ ხარჯებს; ტვირთების განბაჟების პროცესი კი უფრო სწრაფი და კომფორტული ხდება.

როგორც "ექსპრესნიუსს" იუსტიციის სამინისტროდან აცნობეს, ამჟამად ქსელი საპილოტე რეჟიმში მუშაობს, სრულად ამოქმედების შემდეგ ერთიანი სავაჭრო ქსელი ყოველწლიურად 1 მილიონ ქაღალდის დოკუმენტს ჩაანაცვლებს, ბიზნესმენებს კი წლის განმავლობაში 4.5 მილიონი დოლარის დაზოგვის საშუალებას მისცემს. ყოველივე ეს საქართველოს ბიზნესის წარმოების კუთხით უფრო მიმზიდველს ხდის.

იუსტიციის სამინისტროს ინფორმაციით, დღევანდელი შეხვედრა მიზნად ისახავდა მხარეებისთვის ინფორმაციის მიღებას იმის შესახებ, თუ რამდენად ეფექტურად მუშაობს ერთიანი სავაჭრო ქსელი და რა სამუშაოებია ჩასატარებელი მის სრულ ამოქმედებამდე.

15 თებერვლიდან ერთიანი სავაჭრო ქსელი საპილოტე რეჟიმში მოქმედებს. პროექტში აქტიურად ფოთისა და ბათუმის პორტები, რამდენიმე საზღვაო ხაზი, საბაჟო ტერმინალი და სატრანსპორტო კომპანია არიან ჩართულნი.

საპილოტე რეჟიმში მოქმედების დღიდან პროგრამის დროდადრო დახვეწისა და ხარვეზების აღმოფხვრის ფონზე მასში ჩართული კომპანიების რიცხვი იზრდება. საზღვაო ხაზების, საბაჟო ტერმინალებისა და სატრანსპორტო კომპანიების წარმომადგენელთათვის სპეციალური ტრენინგები ქსელის ფუნქციების გასაცნობად ტარდება. ბოლო დროს მასში ჩართვის სურვილი რამდენიმე ახალმა კომპანიამ გამოთქვა.

იუსტიციის სამინისტროს ცნობით, ერთიანი სავაჭრო ქსელის სრული დატვირთვით ამოქმედებაზე იუსტიციის სამინისტროს მმართველობის სფეროში მოქმედი სსიპ „მონაცემთა გაცვლის სააგენტო“ მუშაობს. პროგრამაში საქართველოს ფინანსთა სამინისტროს შემოსავლების სამსახური, ფოთისა და ბათუმის საზღვაო პორტები, გადამზიდავი კომპანიები, საბაჟო ტერმინალები, რკინიგზა, ექსპედიტორები და სხვა სუბიექტები არიან ჩართულები.

ერთიანი სავაჭრო ქსელის პროექტი ამერიკის შეერთებული შტატების საერთაშორისო განვითარების სააგენტოს (USAID) მხარდაჭერით ხორციელდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

რესპუბლიკელებმა დაბლოკეს ირანთან ომთან დაკავშირებით ტრამპის უფლებამოსილების შეზღუდვის მცდელობა

რუსეთის ხელისუფლებამ სტენფორდის უნივერსიტეტი „არასასურველ ორგანიზაციად“ გამოაცხადა

აზერბაიჯანულმა მხარემ ოცნების რეჟიმს სადიგოვის ექსტრადიციის მოთხოვნის „განუხილავად დატოვება“ შესთავაზა.

ოკუპირებულ დონეცკში კობა ხაბაზს დაუსწრებლად 13 წლით თავისუფლების აღკვეთა მიუსაჯეს