ანტონ ჩეჩინის საქმეზე მოსამართლე ჯვებე ნაჭყებია განაჩენს 2 სექტემბერს გამოაცხადებს

2025-08-27 14:20:13, 1051 ნახვა

სამართალი

აქციების დროს ნარკოდანაშაულით დაკავებული რუსეთის მოქალაქის, ანტონ ჩეჩინის საქმეზე განაჩენს მოსამართლე ჯვებე ნაჭყებია 2 სექტემბერს გამოაცხადებს.

თბილისის საქალაქო სასამართლოში, ანტონ ჩეჩინის მომდევნო პროცესი 10:30 საათზე ჩაინიშნა, აღნიშნულ სხდომაზე სასამართლოს დასკვნითი სიტყვით მიმართავს ბრალდებული, რის შემდეგად ჯვებე ნაჭყებია სათათბიროდ გავა და გადაწყვეტილებას გამოიტანს.

დღევანდელ სხდომაზე სასამართლოს დასკვნითი სიტყვით მიმართა ჩეჩინის ადვოკატმა. პროცესს გერმანიის საელჩოს წარმომადგენლებიც ესწრებოდნენ.

ანტონ ჩეჩინი 2024 წლის 3 დეკემბერს სახლთან დააკავეს. მას დიდი ოდენობით ნარკოტიკული საშუალებების შეძენა-შენახვას ედავებიან, რაც 20 წლამდე ან უვადო პატიმრობას ითვალისწინებს. ჩეჩინი ბრალს არ აღიარებს, დაცვის მხარის განცხადებით, მას ნარკოტიკული საშუალებები ჩაუდეს. საქმეში არ არსებობს ნეიტრალური მტკიცებულებები.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,