პოლონეთში, ბალტიის ზღვის სანაპიროსთან, ქვეყნის უდიდესი ნავთობის საბადო აღმოაჩინეს, განაცხადა Central European Petroleum (CEP), რომელიც ფლობს და მართავს ვოლინის კონცესიას პოლონეთის ჩრდილო-დასავლეთში.

პრესრელიზში აღნიშნულია, რომ სვინოუისცესთან ახლოს მდებარე Wolin East 1 (WE1) ჭაბურღილი პოლონეთში ყველაზე დიდი ცნობილი ტრადიციული ნახშირწყალბადის წყაროა და ბოლო ათწლეულის განმავლობაში ევროპაში აღმოჩენილ ერთ-ერთ ყველაზე მნიშვნელოვან ნავთობის საბადოს წარმოადგენს. CEP-ის წინასწარი შეფასებით, საბადო შეიცავს 22 მილიონ ტონა ნედლი ნავთობისა და კონდენსატის რეზერვს, ასევე 5 მილიარდ კუბურ მეტრ კომერციული ხარისხის ბუნებრივ აირს.

საერთო ჯამში, კონცესიის ტერიტორიაზე, რომელიც 593 კვ. კმ-ს მოიცავს, შეფასებით, 33 მილიონ ტონაზე მეტი ნავთობი და კონდენსატი, ასევე 27 მილიარდი კუბური მეტრი გაზი ინახება. პოლონური გამოცემა TVP-ის ცნობით, ახალი საბადო პოლონეთის ნავთობის ამჟამინდელ სავარაუდო მარაგს გააორმაგებს, რომელიც 2023 წლისთვის დაახლოებით 20.2 მილიონ ტონად იყო შეფასებული.

CEP-ის აღმასრულებელი დირექტორის, როლფ სკაარის თქმით, ახალი საბადოების აღმოჩენა „ისტორიული მომენტია“. „ჩვენი მიზანია, უზრუნველვყოთ პროექტის სწრაფი, ტექნიკურად ეფექტური განხორციელება ქვეყნის სტრატეგიული ინტერესების შესაბამისად“, - განაცხადა მან.

„ვოლინ-ისტის ნახშირწყალბადების საბადოს აღმოჩენამ შესაძლოა პოლონეთში ნახშირწყალბადების მოძიების ისტორიაში გარღვევა გამოიწვიოს, განსაკუთრებით იმ ადგილებში, რომლებიც ჯერ კიდევ საკმარისად არ არის შესწავლილი“, - განაცხადა პოლონეთის სახელმწიფო მდივნის მოადგილემ და მთავარმა გეოლოგმა კშიშტოფ გალოშმა. მან აღნიშნა, რომ საბადოების ექსპლუატაციაში გაშვება ხელს შეუწყობს ქვეყნის ენერგეტიკული უსაფრთხოების გაძლიერებას და შეამცირებს მის დამოკიდებულებას ნახშირწყალბადების გარე მომწოდებლებზე.

„Central European Petroleum Ltd.“ — ნორვეგიელი ინვესტორების მიერ კონტროლირებადი კანადური კომპანიაა, რომელიც თავდაპირველად ევროკავშირში, განსაკუთრებით გერმანიაში, ნახშირწყალბადების მოსაძიებლად შეიქმნა, აღნიშნავს „Euronews“.

ავტორი: ექსპრესნიუსი,

სოციალური ქსელები

ბათუმელები: მკითხველის დახმარებით, გადავიხადეთ საბიუჯეტო დავალიანება - 47 000 ლარი

ზურა ვარდიაშვილი- სასამართლოს მანდატურის უფროსი მეცა, შენობაში შემათრია, პირადობა ჩამომართვა

კალაძე- ვერავის მოჰყავს მაგალითი, რა გააკეთა ქართულმა ოცნებამ რუსული.

მზად ვართ, საგადასახადო შეთანხმების შემთხვევაში, ბათუმელებს ყადაღა მოვუხსნათ- შემოსავლების სამსახური