2016-03-18 15:16:10, 704 ნახვა

---

თიბისი გალერეაში კომპანია Dalberg-ის კალიფორნიის წარმომადგენლობის ხელმძღვანელის საჯარო ლექცია გაიმართა

თიბისი გალერეაში  ათასწლეულის გამოწვევის  ფონდი-საქართველოსა და „თიბისი ბანკის“  ორგანიზებით,  გაიმართა  აშშ-ს საერთაშორისო საკონსულტაციო  კომპანია Dalberg-ის კალიფორნიის  წარმომადგენლობის  ხელმძღვანელის, ჯო  დოგერთის  საჯარო ლექცია  და დისკუსია  თემაზე-ფილანტროპიის მიღმა: ინვესტიცია საერთო, ურთიერთმომგებიან ფასეულობებში.

ლექციის დაწყებამდე, მისასალმებელი სიტყვით გამოვიდა თიბისი ბანკის სამეთვალყურეო  საბჭოს თავმჯდომარე  მამუკა ხაზარაძე და ათასწლეულის  გამოწვევის  ფონდის  აღმასრულებელი დირექტორი მაგდა მაღრაძე. ლექციის დამთავრებისა  საჯარო  დისკუსია გაიმართა.

"ჩვენთვის თემა სოციალური პასუხისმგებლობის და საერთოდ დამოკიდებულების ბიზნესის გარე სამყაროსთან არა ბიზნესური ასპექტით, არის ძალიან მნიშვნელოვანი, რამეთუ  ჩვენი ფილოსოფია  შექმნის დღიდან ემყარება იმას, რომ მარტივად რომ ავხსნათ, ვერ იქნები ბედნიერი, თუ შენ  გარშემო ბევრი გაჭირვებული და  დაულაგებელი თემა არსებობს. საერთოდ, ბიზნესიც არის ჩემი აზრით იმ საქმის კეთება,  რომელიც შენს გარშემო სხვას სჭირდება. სხვას რაც სჭირდება, ეს არ არის მხოლოდ პროდუქტი, სერვისი, რაღაც მომსახურება, თუ ასე შემდეგ. ეს არის დამოკიდებულება, ყურადღება  და ის პასუხისმგებლობა, რომ შენს გვერდზე მყოფი ადამიანები, საზოგადოება გრძნობდეს  არა მარტო იმას, რომ შენ რაღაც გადასახადებს იხდი და კანონმდებლობას ემორჩილები, სწორად აკეთებ ბიზნესს, არამედ  იმას, რომ შენ ამას აკეთებ მთელი გულით და ცდილობ, რომ  ლიდერის პოზიცია  შეინარჩუნო და ამ ადამიანებს მისცე საშუალება,  მათაც შექმნან თავიანთი  თემები, თავიანთ სფეროში გაძლიერდნენ და  თუ ამას ზემოდან ემატება გულწრფელი ქველმოქმედება, ეს კიდევ ალამაზებს ამას ყველაფერს",-განაცხადა ხაზარაძემ.

მსოფლიოს წამყვანმა კომპანიებმა  საქველმოქმედო  შემოწირულობების  მიმართ  ტრადიციული მიდგომა  "საერთო ფასეულობების" ინიციატიცით ჩაანაცვლეს, რაც ფილანტროპიის  მეშვეობით  განხორციელებულ  იმ ინვესტიციებს გულისხმობს, რომლებიც არა მხოლოდ  საზოგადოების მოთხოვნებს პასუხობს, არამედ  თავად კომპანიების გრძელვადიან  ინტერესებსაც ემსახურება.

ათასწლეულის გამოწვევის ფონდისთვის, რომელიც ახორცირელებს  აშშ-ს ათასწლეულის  გამოწვევის  კორპორაციის 140 მილიონი  დოლარის გრანტს,  მნიშვნელოვანია  ინდუსტრიასთან  და კერძო სექტორთან  პარტნიორობა. საქართველოსა და ამერიკის მთავრობებს  შორის  დადებული ხელშეკრულების  საფუძველზე, ათასწლეულის გამოწვევის   ფონდი საინჟინრო, საბუნებისმეტყველო და ტექნოლოგიური განათლების ხარისხის  გაძლიერების მიზნით  ზოგადი,  პროფესიული  და უმაღლესი განატლების მიმართულებით საგანმანათლებლო პროექტებს  ახორციელებს. აღნიშნული საგანმანათლებლო პროექტები მიზნად ისახავს  ინდუსტრიის, შრომის ბაზრის მოთხოვნების  შესაბამისი  სამუშაო ძალის  მომზადებას, რაც ხელს შეუწყობს  ქვეყნის ეკონომიკის გაძლიერებას. შესაბამისად, მნიშვნელოვანია,  ადამიანური კაპიტალის ინვესტიციაში, კერძო სექტორის მხრიდან მოხდეს  ე.წ. "საერთო ფასეულობების" გაძლიერება. შესაბამისად, საჯარო ლექცია  დაეთმო აღნიშნულ  კონცეფციაზე საუბარს, მოხდა  რამდენიმე არსებული საუკეთესო მაგალითის  განხილვა და კორპორატიული-სოციალური  პასუხისმგებლობის  საერთაშორისო  გამოცდილების გაზიარება.

---

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

---

დღის თემა

მთავარი თემა

ინტერვიუ - ექსკლუზივი