ამ ვიზიტის და მისი განცხადებების შედეგად, რა თქმა უნდა, რჩება შთაბეჭდილება, რომ ამ ადამიანს არ ესმის ქვეყანაში შექმნილი მდგომარეობის სიმძიმე არამხოლოდ საქართველოსთვის, არამედ საერთაშორისო საზოგადოებისთვის, - ასე აფასებს „ერთიანობა - ნაციონალური მოძრაობის“ გენერალური მდივნის მოადგილე ირაკლი ფავლენიშვილი, საქართველოში ეუთო-ს გენერალური მდივნის, ფერიდუნ სინირლიოღლუს ვიზიტსა და მის მიერ გაკეთებულ განცხადებას.

ირაკლი ფავლენიშვილის თქმით, მნიშვნელოვანია, რომ საერთაშორისო საზოგადოებაში კარგად აღიქვამდნენ იმ საფრთხეს, რომელსაც „წარმოადგენს ივანიშვილის რეჟიმი არამხოლოდ საქართველოსთვის, არამედ ევროპული უსაფრთხოებისთვის“.

„როდესაც ქვეყანაში დიქტატურა მყარდება და სამოქალაქო პოლიტიკური უფლებები ყოველდღიურად ნადგურდება და იზღუდება, ამ დროს, რა თქმა უნდა, საერთაშორისო ინსტიტუციის ყველა წარმომადგენელი უნდა იყოს ადეკვატური შექმნილ გარემოში. ეს, მათ შორის, მნიშვნელოვანი იქნება უსაფრთხოებისთვის და სტაბილურობისთვის მთელი მსოფლიოს მასშტაბით, იმიტომ, რომ დემოკრატიული სისტემების ავტოკრატიულისკენ ცვლილება აბსოლუტურად ყველასთვის გამოწვევაა.

ამ ვიზიტის და მისი განცხადებების შედეგად, რა თქმა უნდა, რჩება შთაბეჭდილება, რომ ამ ადამიანს არ ესმის ქვეყანაში შექმნილი მდგომარეობის სიმძიმე არამხოლოდ საქართველოსთვის, არამედ საერთაშორისო საზოგადოებისთვის. თუმცა, ფაქტია, რომ ივანიშვილის რეჟიმი ვერ აღწევს იმ ლეგიტიმაციას და იმ აღიარებას, რასაც ის ესწრაფოდა დასავლურ სამყაროში ასეთი იზოლირებული და სანქცირებული დე ფაქტო ხელისუფლება საქართველოს არასდროს ჰყოლია მისი უახლოესი ისტორიის მანძილზე.

[საპარლამენტო არჩევნებთან დაკავშირებით] ეუთო/ოდირის დასკვნაშიც ხაზგასმული იყო ის, რომელზედაც საუბრობდა ოპოზიცია, თუ არასამთავრობო სექტორი, თუმცა ჩვენ არ ვსაუბრობთ მხოლოდ არჩევნების ტოტალურ გაყალბებაზე, ჩვენ ვსაუბრობთ ქვეყანაზე, სადაც დასავლური კურსი შეიცვალა, ევროპული ინტეგრაცია შეჩერდა, ადამიანები აწამეს, არაადამიანურად მოეპყრნენ და ამის შემდგომ ერთი ადამიანის იდენტიფიცირება, დასჯა არ მომხდარა, გვყავს ათეულობით პოლიტიკური ტყვე. ასე რომ, როდესაც ვსაუბრობთ საქართველოში შექმნილ სიტუაციაზე, მხოლოდ საარჩევნო ფაქტორი არ არსებობს. იმისთვის, რომ კარგად აანალიზებდე ქვეყანაში შექმნილ სიტუაციას, უფრო კონკრეტულად უნდა აღვიქვამდე პროცესს და დასკვნების გასაკეთებლად საარჩევნო პროცესი არ არის აუცილებელი“, - განაცხადა ირაკლი ფავლენიშვილმა.

ავტორი: ექსპრესნიუსი,

სოციალური ქსელები

Politico - ევროკავშირი წლის ბოლომდე უკრაინისთვის 45 მილიარდი ევროს ოდენობის სესხის გამოყოფას გეგმავს.

პაპუაშვილი - იმაზე სამჯერ მეტი ადამიანი მონათლა გუშინ პატრიარქმა ზემო აჭარაში, ვიდრე თბილისში აქციაზე ვიხილეთ

სამადაშვილი - რუსების მოკავშირე ავტოკრატია დაემხო სერბეთში. რუსეთმა და ივანიშვილის რეჟიმმა კიდევ ერთი მოკავშირე დაკარგა

transparency international - ოცნება სულ მცირე 800 000 მოქალაქეს პოლიტიკური არჩევანის გარეშე დატოვებს