ნეტგაზეთი/ბათუმელების თანადამფუძნებელი და დირექტორი, მზია ამაღლობელი პატიმრობაში რჩება. გადაწყვეტილება ბათუმის საქალაქო სასამართლოს მოსამართლე ვიქტორ მეტრეველმა მიიღო.

დღეს, 4 მარტს გამართულ წინასასამართლო სხდომაზე მეტრეველმა ამაღლობელისთვის აღკვეთოს ღონისძიების გადასინჯვის შესახებ იმსჯელა.

ბათუმის საქალაქო სასამართლოში მზია ამაღლობელის წინასასამართლო სხდომა მიმდინარეობს.

ამაღლობელის ადვოკატებმა დღეს მისი გათავისუფლების მიზნით აღკვეთის ღონისძიების მოხსნა მოითხოვეს. პროკურორებმა განაცხადეს, რომ ჯერ კიდევ არსებობს „რისკი“, რომ მზია ამაღლობელმა „კიდევ ერთი დანაშაული ჩაიდინოს“ ან „მოწმეებზე ზეგავლენა მოახდინოს“ და ამიტომ ის პატიმრობაში დარჩეს.

ამაღლობელის ადვოკატმა, მაია მწარიაშვილმა განაცხადა, რომ პროკურატურამ ამ ბრალდებების გასამყარებლად ერთი არგუმენტი ვერ წარმოადგინა. თუმცა, მოსამართლემ პროკურატურის პოზიციას მხარი დაუჭირა და შუამდგომლობა არ დააკმაყოფილა - ამაღლობელი პატიმრობაში დარჩა.

გადაწყვეტილების გამოცხადებას სასამართლო დარბაზში მყოფთა პროტესტი და შეძახილები მოჰყვა.

მზია ამაღლობელის ადვოკატი, მაია მწარიაშვილი ამბობს, რომ გამოძიებას უნდა, რომ ქექოს მზია ამაღლობელის პირადი და პროფესიული ცხოვრება

„ამ პატაკის საფუძველზე არ შეიძლება არანაირი საპროცესო მოქმედების ჩატარება, არათუ განჩინების აღება,“ – მზია ამაღლობელის ადვოკატი მაია მწარიაშვილი ასე აფასებს პროკურატურის მოთხოვნას, საქმის მასალებში მოხვდეს მზია ამაღლობელის ტელეფონიდან ამოღებული ინფორმაცია.

დღევანდელ სასამართლო სხდომაზე გაირკვა, რომ ამაღლობელის საქმეში წარდგენილია დეტექტივ ვლადიმერ ჩიტაიას პატაკი.

ვლადიმერ ჩიტაია 15 თებერვლით დათარიღებულ პატაკში გურიის პოლიციის დეპარტამენტის დირექტორის მოადგილეს, პოლკოვნიკ სერგი ჟღენტს წერს, რომ მის ხელთ არსებული ინფორმაციით, „მზია ამაღლობელის მიერ პოლიციელზე თავდასხმა წინასწარ იყო დაგეგმილი, რასთან დაკავშირებითაც თავდასხმამდე მზია ამაღლობელი მობილური ტელეფონის აპლიკაციით ესაუბრებოდა ამ ეტაპზე დაუდგენელ პირებს, რომლებთანაც ჰქონდა მიმოწერა და იღებდა ინსტრუქციებს“.

სწორედ ამ პატაკით ითხოვს პროკურატურა მზია ამაღლობელის ტელეფონზე წვდომას.

ავტორი: ექსპრესნიუსი,

სოციალური ქსელები

აზერბაიჯანულმა მხარემ ოცნების რეჟიმს სადიგოვის ექსტრადიციის მოთხოვნის „განუხილავად დატოვება“ შესთავაზა.

ოკუპირებულ დონეცკში კობა ხაბაზს დაუსწრებლად 13 წლით თავისუფლების აღკვეთა მიუსაჯეს

9 აპრილის მემორიალთან დაკავებულ მოქალაქეს 10-დღიანი პატიმრობა შეეფარდა

ზაზა ფაჩულია რაჭაში სადმელი ჰესს ააშენებს