ეროვნულ თავდაცვის აკადემიაში ღია კარის დღე გაიხსნა

2016-03-09 17:59:19, 474 ნახვა

საზოგადოება

დავით აღმაშენებლის სახელობის ეროვნულ თავდაცის აკადემიაში საქართველოს შეიარაღებული ძალების გენერალური შტაბის უფროსმა, გენერალ-მაიორმა ვახტანგ კაპანაძემ ღია კარის დღე გახსნა.

საბაკალავრო სკოლის IV კურსის იუნკერმა, რიგითმა გიორგი ფერაძემ აბიტურიენტებს სკოლაში მიღების პირობების, არსებული საგანმანათლებლო და გაცვლითი პროგრამების შესახებ პრეზენტაცია წარუდგინა. ახალგაზრდებმა უმაღლეს სამხედრო სასწავლებელში სწავლის უპირატესობასა და სხვა მნიშვნელოვან დეტალებზეც მიიღეს ინფორმაცია. შეხვედრის შემდეგ სტუმრებმა აკადემიის ინფრასტრუქტურა დაათვალიერეს.

ეროვნულ თავდაცვის აკადემიაში საბუთების მიღება 28 მარტიდან 17 ივნისის ჩათვლით იწარმოებს. ერთიან ეროვნულ გამოცდებამდე აბიტურიენტები აკადემიის შიდა ტურებს გაივლიან, რომელიც ფიზიკურ მომზადებას, სამედიცინო შემოწმებასა და გასაუბრებას მოიცავს. ერთიან ეროვნულ გამოცდებზე კი შემდეგი საგნები ბარდება - ქართული ენა, ზოგადი უნარები, უცხო ენა და მათემატიკა.

ეროვნულ თავდაცვის აკადემიაში მიღება მენეჯმენტისა და ინფორმატიკის საბაკალავრო პროგრამებზე ხორციელდება. იუნკერები თანამედროვე სტანდარტების შესაბამისი მატერიალურ-ტექნიკური ბაზით, დაზღვევით, საცხოვრებელი ადგილით, კვებით, ფორმითა და სამედიცინო მომსახურებით იქნებიან უზრუნველყოფილნი.

სწავლის დასრულების შემდეგ იუნკერი იღებს ბაკალავრის ხარისხს შესაბამის სპეციალობაში და ოფიცრის პირველად სამხედრო წოდებას - "ლეიტენანტი".

ეროვნულ თავდაცვის აკადემიაში სწავლა სრულად ფინანსდება საქართველოს თავდაცვის სამინისტრო მიერ.