გიორგი პაპუაშვილი სტრასბურგის მოსამართლე ვერ გახდება

2016-03-05 22:00:12, 786 ნახვა

სამართალი

საკონსტიტუციო სასამართლოს თავმჯდომარე, გიორგი პაპუაშვილი სპეციალურმა კომისიამ არასაკმარისად კომპეტენტურ კანდიდატად მიიჩნია და დაბალი ქულები დაუწერა, რის გამოც ის სტრასბურგის მოსამართლე ვერ გახდება.

კომისიის, რომელმაც პაპუაშვილი არასაკმარისად კომპეტენტურ კანდიდატად მიიჩნია, ხელმძღვანელი თეა წულუკიანია.

გიორგი პაპუაშვილი რუსთავი 2-ის ეთერში ამბობს, რომ კრიტიკა და გაღიზიანება გახმაურებულ საქმეებზე ხელისუფლებისთვის არასასურველი გადაწყვეტილებების მიღებას უკავშირდება.

საკონსტიტუციო სასამართლოს თავმჯდომარის მტკიცებით, რუსთავი2–ის, გიგი უგულავას და ეროვნული ბანკის საქმეების განხილვის დაწყებამდე მას თეა წულუკიანი ხელისუფლებასთან თანამშრომლობას სთავაზობდა. სანაცვლოდ კი, ვენეციის კომისიაში ვადის გაგრძელებას ჰპირდებოდა.

გიორგი პაპუაშვილმა პროცესი "პოლიტიკურად მოტივირებულად" შეაფასა და იუსტიციის მინისტრი პოლიტიკურ ანგარიშსწორებაში დაადანაშაულა. იუსტიციის მინისტრმა კი პაპუაშვილის სკანდალური განცხადებები სამთავრობო კომისიის გადაწყვეტილების გამო განაწყენებას დაუკავშირა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან