2024-10-30 21:32:35, 305 ნახვა

---

მაკა ბოჭორიშვილი - საქართველოს ხელისუფლებას აქვს ამბიცია, 2028 წლისთვის ევროკავშირთან ასოცირების შეთანხმებით ნაკისრი ვალდებულებების 90%-ზე მეტი ჰქონდეს შესრულებული

მიუხედავად იმისა, რომ გარკვეულ სფეროებში ანგარიშში გვხვდება კრიტიკული შეფასებები, რაც უცხო არ არის ევროკავშირში ინტეგრაციის პროცესისთვის, საერთო მზაობის დონის განმსაზღვრელ მაჩვენებლებში  საქართველოს უკუსვლა არ აქვს,- განაცხადა საპარლამენტო უმრავლესობის წევრმა, მაკა ბოჭორიშვილმა პარტიის ცენტრალურ ოფისში გამართულ ბრიფინგზე და ევროკომისიის მიერ გამოქვეყნებული ყოველწლიური ანგარიში შეაფასა. 

მისივე თქმით, „იმ გამოწვევების მიუხედავად, რასთან გამკლავება საქართველოს ხელისუფლებას უწევდა მიმდინარე წლის განმავლობაში, ის წინსვლა, რაც ანგარიშში არის დაფიქსირებული ნამდვილად მისასალმებელი და დასაფასებელია“.

ბოჭორიშვილი აცხადებს, რომ ყურადღებით გაეცნობიან რეკომენდაციებს და გაითვალისწინებენ ევროკავშირთან ასოცირების სამოქმედო გეგმის შემდგომი შესრულების პროცესში.

მისივე თქმით, საქართველო ევროკავშირთან დაახლოების უმაღლეს ნიშნულს მიაღწევს და შეიქმნება მტკიცე საფუძველი იმისთვის, რომ 2030 წელს კანდიდატ ქვეყნებს შორის ყველაზე მეტად მზად საქართველო იყოს ევროკავშირში წევრობისთვის.

„ანგარიში შეფასებებთან ერთად მოიცავს რეკომენდაციებს 35-ვე სფეროში. ჩვენ ყურადღებით შევისწავლით თითოეულ რეკომენდაციას, გავაკეთებთ მათ ღრმა ანალიზს და მაქსიმალურად გავითვალისწინებთ ევროკავშირთან ასოცირების სამოქმედო გეგმის შემდგომი შესრულების პროცესში. უკვე მიღწეული პროგრესის და არსებული გამოცდილების გათვალისწინებით, საქართველოს ხელისუფლებას აქვს ამბიცია, რომ 2028 წლისთვის ევროკავშირთან ასოცირების შეთანხმებით ნაკისრი ვალდებულებების 90 პროცენტზე მეტი ჰქონდეს შესრულებული. ამით საქართველო ევროკავშირთან დაახლოების უმაღლეს ნიშნულს მიაღწევს და შეიქმნება მტკიცე საფუძველი იმისთვის, რომ 2030 წელს კანდიდატ ქვეყნებს შორის ყველაზე მეტად მზად საქართველო იყოს ევროკავშირში წევრობისთვის. საქართველო ბოლო 10 წლის განმავლობაში ბევრი მიმართულებით იქცა რეგიონში მოწინავე ქვეყნად, სწორედ იმ წარმატებული რეფორმების საფუძველზე, რომელიც „ქართული ოცნების“ მმართველობის პირობებშია გატარებული. ამას ადასტურებს სხვადასხვა დამოუკიდებელი საერთაშორისო ორგანიზაციის კვლევები და რეიტინგები“-აღნიშნავს ბოჭორიშვილი.

ბოჭორიშვილი აცხადებს, რომ „ქართული ოცნების“ ხელისუფლება გააგრძელებს ბრძოლას ქვეყნის განვითარებისთვის და ღირსეული ევროპული მომავლისთვის. 

„ქართველი ხალხის მიერ 26 ოქტომბერს გამოცხადებული ნდობის და მოპოვებული მტკიცე მანდატის საფუძველზე დღეს თამამად შეგვიძლია ვთქვათ, რომ „ქართული ოცნების“ ხელისუფლება გააგრძელებს ქვეყნის განვითარებისთვის ბრძოლას და ღირსეული ევროპული მომავლისკენ ქვეყნის წაყვანას. იმისთვის, რომ საქართველოს სვლა ევროკავშირისკენ არ შეფერხდეს, პროცესი უნდა წარიმართოს დიალოგის ფორმატში. მოველით, რომ ევროკავშირის მხრიდან იქნება საკმარისი ღიაობა იმისთვის, რომ საქართველოს პროგრესის და მისწრაფებების გათვალისწინებით, ერთად მუშაობით და თანამშრომლობით შევძლოთ საქართველოს ევროკავშირში ინტეგრაციის პროცესის წარმატებით გაგრძელება და კიდევ უფრო მეტი პროგრესის მიღწევა უახლოეს მომავალში“.-განაცხადა მაკა ბოჭორიშვილმა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი