ბოტკოველი - თურნავას გადაწყვეტილების შემდეგ, სებ-ის თანამშრომლებმა საპროტესტო პეტიცია მოამზადეს

2023-09-25 16:56:23, 656 ნახვა

პოლიტიკა

ბოტკოველი - თურნავას გადაწყვეტილების შემდეგ, სებ-ის თანამშრომლებმა საპროტესტო პეტიცია მოამზადეს - სუს-მა დაკითხა ყველა

"ერთიანი ნაციონალური მოძრაობის" რეგიონული მდივანი გიორგი ბოტკოველი აცხადებს, რომ სანქციათა რეჟიმის შესრულების წესში ცვლილების შემდეგ, საქართველოს ეროვნული ბანკის თანამშრომლებმა საპროტესტო პეტიცია მოამზადეს.

ბოტკოველის თქმით, ამის შემდეგ საქმეში სახელმწიფო უსაფრთხოების სამსახური ჩაერთო და "ყველა თანამშრომელი დაკითხა".

“ნათია თურნავას გადაწყვეტილებამ, რა თქმა უნდა, უკმაყოფილება გამოიწვია თვითონ საბჭოს წევრებში და ერთმანეთის მიყოლებით ვიცე-პრეზიდენტებმა დატოვეს თანამდებობები. ამასთან ერთად, შიგნით ბანკში დაიწყოს საპროტესტო პეტიციის შეგროვება, რომელსაც ხელს აწერდნენ ბანკის თანამშრომლები.

ამ ინფორმაციამ საიდანღაც გაჟონა, ჩაერთო მთელი ძალოვანი სტრუქტურა - სუს-ი და შევიდნენ ძალოვანი სტრუქტურის თანამშრომლები და დაიწყეს თანამშრომლების დაბარება უკვე ეროვნულ ბანკში, ასე ვთქვათ "ეიჩ არის" ოთხში და სათითაოდ დაუწყეს ადამიანებს პოზიციის შეცვლისკენ მითითებები და ამის შემდეგ ჩაიშალა ეს პროცესი.

ეს ნიშნავს იმას, რომ იქ პროტესტი გამოხატეს არა კონკრეტულმა ადამიანებმა, ვინც იყვნენ ეროვნული ბანკის საბჭოს წევრები, არამედ თითქმის ყველა რიგითმა თანამშრომელმა",- განაცხადა ბოტკოველმა.

შეგახსენებთ, 14 სექტემბერს გავრცელდა ინფორმაცია, რომ ამერიკის შეერთებული შტატების ხაზინის დეპარტამენტმა 150-ზე მეტ კომპანიასა და პირს სანქციები დაუწესა. სანქცირებულთა შორისაა საქართველოს ყოფილი მთავარი პროკურორი ოთარ ფარცხალაძე.

"სანქცირებულებს შორის ასევე არის ქართველ-რუსი ოლიგარქი. სახელმწიფო დეპარტამენტის თქმით, რუსეთის ფედერალური უსაფრთხოების სამსახური მუშაობდა ამ ოლიგარქთან, რათან მას გავლენა მოეხდინა საქართველოს საზოგადოებასა და პოლიტიკაზე რუსეთის სასარგებლოდ", - დაწერა გამოცემა Associated Press-მა აშშ-ის სახელმწიფო დეპარტამენტზე დაყრდნობით.

18 სექტემბერს, საქართველოს ეროვნულმა ბანკმა განაცხადა, რომ ქართულმა ბანკებმა ფარცხალაძეს ყველა ანგარიში გაუყინეს და შეჩერებული იყო გადარიცხვები. სებ-ის განცხადების თანახმად, ყოფილ მთავარ პროკურორს საერთაშორისო ფინანსური სანქციების აღსრულების მექანიზმის გათვალისწინებით, ეზღუდებოდა როგორც სახსრების განკარგვა, ისე ყველა სახის ფინანსური ოპერაციის განხორციელების შესაძლებლობა.

ეროვნული ბანკის გადაწყვეტილებას იმავე დღეს გამოეხმაურა "ქართული ოცნების" თავმჯდომარე ირაკლი კობახიძე და თქვა, რომ გადაწყვეტილება საქართველოს კონსტიტუციასა და უდანაშაულობის პრეზუმფციას ეწინააღმდეგებოდა.

ერთდღიანი ინტერვალით, ეროვნულმა ბანკმა გადაწყვეტილება შეცვალა და 19 სექტემბერს, სანქციათა რეჟიმების შესრულების წესში ცვლილება შეიტანა.

სებ-ის პრეზიდენტის 2023 წლის 4 აგვისტოს N208/04 ბრძანებაში შეტანილი ცვლილების თანახმად, სანქციათა რეჟიმები ვრცელდება:

ა) საქართველოს მოქალაქეზე, თუ მის მიმართ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი;

ბ) საქართველოში რეგისტრირებულ იურიდიულ პირზე, რომლის წილს ფლობს (ფლობენ) სანქცირებული საქართველოს მოქალაქე (მოქალაქეები), თუ დაწესებული სანქციების საფუძველთან დაკავშირებით გამოტანილია საქართველოს სასამართლოს კანონიერ ძალაში შესული გამამტყუნებელი განაჩენი.

სებ-ის გადაწყვეტილების შემდეგ, 20 სექტემბერს ეროვნული ბანკი სამმა ვიცე-პრეზიდენტმა - პაპუნა ლეჟავამ, არჩილ მესტვირიშვილმა და ნიკოლოზ გაგუამ დატოვეს. თანამდებობა დატოვა ასევე საქართველოს ეროვნული ბანკის პრეზიდენტის მრჩეველმა, გიორგი ბაქრაძემაც.