ნინო ნიჟარაძე იმ მოქალაქეებს შეხვდა, რომლებიც სამინისტროს პროგრამებით ძვირადღირებული ბიოლოგიური მედიკამენტებით ფინანსდებიან

2022-08-05 12:30:34, 2280 ნახვა

რეგიონი

აჭარის ა/რ ჯანმრთელობისა და სოციალური დაცვის მინისტრი, ნინო ნიჟარაძე, პირველ მოადგილესთან, მარი ზანაქიძესთან ერთად იმ მოქალაქეებს შეხვდა, რომლებიც სამინისტროს პროგრამებით ძვირადღირებული ბიოლოგიური მედიკამენტებით ფინანსდებიან.

„ბოლო ორი წელია სამინისტრო აფინანსებს რევმატოიდული ართრიტის მძიმე ფორმით დაავადებული პაციენტების ძვირადღირებულ მედიკამენტოზურ მკურნალობას. მიმდინარე წელს დავიწყეთ ფსორიაზით, ფსორიაზული ართრიტითა და მაანკილოზირებული სპონდილიტით დაავადებული პაციენტების, ასევე, ძვირადღირებული მედიკამენტებით დაფინანსება. დღეს, შეხვედრა გავმართეთ პროგრამის ბენეფიცარებთან, გავეცანეთ მკურნალობის შედეგებს და მოვისმინეთ მათი მოსაზრებები. პაციენტები აღნიშნავენ, რომ მკურნალობის დაწყების შემდეგ მათი ჯანმრთელობის მდგომარეობა 90% - 100%-ით გაუმჯობესდა, რაც ჩვენთვის ძალიან მნიშვნელოვანია. მომავალი წლიდან სამინისტრო გააფართოვებს პროგრამებს და დაფინანსების მიღება უფრო მეტ მოქალაქეს შეეძლება“, - აღნიშნა აჭარის ა/რ ჯანმრთელობისა და სოციალური დაცვის მინისტრმა, ნინო ნიჟარაძემ.

შეხვედრას ესწრებოდა რევმატოლოგი, ნერიმან ცინცაძე, დერმატო-ვენეროლოგი, ლელა ბერიძე, რევამატოლოგი, ლია საგინაძე და რევმატოლოგი, ია კახიძე.

„პრეპარატები, რომელბსაც პაციენტები სამინისტროს დაფინანსებით ღებულობენ არის პირველი რიგის და ყველაზე თანამედროვე, თითქმის არ გააჩნია გვერდითი მოვლენები. შედეგები გვაქვს ძალიან კარგი. ბევრი პაციენტის დაავადება უკვე გადასულია რემისიაში და თანდათან ვამცირებთ დანიშნული მედიკამენტების რაოდენობას. თამამად შემიძლია ვთქვა, რომ აჭარის ჯანდაცვის სამინისტროს დაფინანსებით პაციენტების მრავალწლიანი ჯანმრთელობის პრობლემები დაძლეულია“ - აღნიშნა რევამტოლოგმა, ნერიმან ცინცაძემ.

სამინისტროს პროგრამებით რავმატოიდული ართრიტის, ფსორიაზის, ფსორიაზული ართრიტის და მაანკილოზირებული სპონდილიტის ძვირადღირებული ბიოლოგიური მედიკამენტებით მკურნალობა 50-მდე ბენეფიციარს უფინანსდება.

„ორი შვილის დედა ვარ, მკურნალობის დაწყებამდე საწოლს ვიყავი მიჯაჭვული, არ შემეძლო გადაადგილება, მქონდა გაუსაძლისი ტკივილი. რაც სპეციალური მედიკამენტის მიღება დავიწყე, შვება ვიგრძენი, შემიძლია ვთქვა, რომ უკვე 100%-ით გამოჯანმრთელებული ვარ“, - აღნიშნა ერთ-ერთი პროგრამის ბენეფიციარმა, თინა სურმანიძემ.

პაციენტების უმრავლესობა აცხადებს, რომ წლების განმავლობაში მათ მკურნალობა საკუთარი ხარჯებით უხდებოდათ, ნაწილს აღნიშნული ფინანსური რესურსი არ გააჩნდა ან მიღებული მედიკამენტები არაეფექტური იყო. თანამედროვე ბიოლოგიური პრეპარატებით მკურნალობის დაწყების შემდეგ კი, მათი ჯანმრთელობის მდგომარეობა საგრძნობლად გაუმჯობესდა.