„ოცნების ქალაქის" საცხოვრებელი ბინების განაწილების კრიტერიუმებზე მუშაობა შესაბამისმა კომისიამ დაასრულა. ამის შესახებ ინფორმაციას აჭარის მთავრობა ავრცელებს. 

,,კომისიის შემადგენლობამ როგორც მთავრობის, ასევე სხვა მხარეების ჩართულობით შეიმუშავა და წარმოადგინა საბოლოო კრიტერიუმები, რომელიც ადგენს საკმაოდ სამართლიან სტანდარტს. მინდა მადლობა გადავუხადო კომისიას პირველ რიგში, და ასევე აღვნიშნო, რომ ამ კრიტერიუმებით ,,ოცნების ქალაქში" მცხოვრები ოჯახების აბსოლუტური უმრავლესობა დაკმაყოფილდება შესაბამისი საცხოვრებლით.

კომისიის მუშაობაში ოცნების ქალაქის მოსახლეობა, საერთაშორისო ორგანიზაცია იუნისეფი და წითელი ჯვარი, საქართველოს სახალხო დამცველის აპარატის წარმომადგენელი და სამთავრობო უწყებების წარმომადგენლები მონაწილეობდნენ. საერთაშორისო სტანდარტების მიხედვით შემუშავებული კრიტერიუმების გათვალისწინებით, საცხოვრებელი ბინები, შესაბამისი სოციალური მდგომარეობის და საჭიროების მქონე ოცნების ქალაქში მცხოვრებ ყველა მოქალაქეს გადაეცემა.

აღნიშნული გადაწყვეტილების შესახებ გაცხადება დღეს აჭარის მთავრობის თავმჯდომარემ, თორნიკე რიჟვაძემ მთავრობის სხდომაზე გააკეთა. დადგენილი ძირითადი კრიტერიუმის მიხედვით საცხოვრებელ ბინებს შშმ პირები, სპეციალური სამედიცინო საჭიროების, ასევე სოციალური ქულების მქონე მოქალაქეები, მარტოხელა მშობელი, მარჩენალდაკარგული, ეკომიგრანტები, იძულებით გადაადგილებული და სხვა პირები მიიღებენ.

პარალელურად, "ოცნების ქალაქის" მშენებლობის მეორე ეტაპი იწყება. პროექტის ახალი ეტაპი უკვე მთლიანი ტერიტორიის დაგეგმარებას, სწორ ურბანულ განვითარებას, საგანმანათლებლო, საცხოვრებელი და რეკრეაციული სივრცეების შექმნას გულისხმობს.

„ოცნების ქალაქში" დამატებით მრავალბინიანი საცხოვრებელი სახლები, საჯარო სკოლა და საბავშვო ბაღი აშენდება. მეორე ეტაპის ფარგლებში, ტერიტორიაზე ასევე საპარკინგე ზონა, საბავშვო მოედანი, საფეხმავლო და ველობილიკები და გარე განათებები მოეწყობა. საცხოვრებელი სახლები გაზ-მომარაგების, წყლისა და წყალარინების სისტემებით აღიჭურვება. მოქალაქეებს ადგილზე სხვადასხვა სერვისებზე წვდომის შესაძლებლობა ექნებათ.

მეორე ეტაპი განაშენიანების დეტალურ გეგმას და ამავე გეგმის მიხედვით ერთ-ერთ კვარტალში, საცხოვრებელი კომპლექსის მშენებლობის პროექტის მომზადებას ითვალისწინებს.

„ოცნების ქალაქის" პროექტის პირველი ეტაპის ფარგლებში კი, სამშენებლო სამუშაოები, შესაბამისი რეკომენდაციების  დაცვით უწყვეტად მიმდინარეობს. ამ ეტაპზე, „ოცნების ქალაქის" სამშენებლო ტერიტორიაზე სამი 12 სართულიანი საცხოვრებელი ბინის მშენებლობა დასკვნით ეტაპზეა. პროექტის ფარგლებში, პირველ ეტაპზე, დაახლოებით 582 ბინა მოეწყობა. სამუშაო პროცესში დაახლოებით 120 ადამიანია დასაქმებული.

„ოცნების ქალაქი"-ს მშენებლობის გადაწყვეტილება აჭარის მთავრობამ იქ არსებული მძიმე სოციალური და შეუსაბამო საცხოვრებელი პირობების გამო მიიღო.

ავტორი: ექსპრესნიუსი,

სოციალური ქსელები

ევროპის საბჭოს გენერალური მდივანი - ევროპა ოპოზიციის აკრძალვის შესახებ მოსმენების წინ, დააკვირდება ყველა მოქალაქის ფუნდამენტური უფლებებისა და თავისუფლებების დაცვას

დიდი ბრიტანეთი საუდის არაბეთში ჰუსიტების თავდასხმებისგან დასაცავად Typhoon-ის გამანადგურებლებს გაგზავნის

პენიტენციური ამტკიცებს რომ დავით ფეიქრიშვილმა მინები ჩაამტვრია და თვითდაზიანება სცადა, პატიმრებს დეზორგანიზაციისკენ მოუწოდებდა

ივანიშვილის წარმომადგენელი კობახიძე ოპოზიციურ პარტიებს ჰიტლერს ადარებს და მათი აკრძალვის აუცილებლობაზე საუბრობს