ჩეხეთის სოლიდარობის ნიშნად, ლიეტუვა, ლატვია და ესტონეთი რუს დიპლომატებს ქვეყნიდან აძევებენ

2021-04-23 18:10:01, 1038 ნახვა

მსოფლიო

ლიეტუვა, ლატვია და ესტონეთი ჩეხეთის სოლიდარობის ნიშნად, რუს დიპლომატებს ქვეყნიდან აძევებენ.

ამის შესახებ ინფორმაციას abc NEWS - ავრცელებს.

გამოცემის ცნობით, ლიეტუვის საგარეო საქმეთა მინისტრის, გაბრიელიუს ლანდსბერგისის განცხადებით, საელჩოს ორი თანამშრომელი პერსონა ნონ გრატად იქნა გამოცხადებული, „რადგან მათ შეასრულეს თავიანთი დიპლომატიური სტატუსისათვის შეუთავსებელი საქმიანობა.“

აღნიშნულის გამო, მათ ქვეყნის დასატოვებლად 7-დღიანი ვადა აქვთ.

ესტონეთის საგარეო საქმეთა სამინისტროში კი აცხადებენ, რომ ქვეყნიდან ერთ რუს დიპლომატს გააძევებენ, რომლის საქმიანობა ვენის კონვენციის შესაბამისად, დიპლომატიურ საქმიანობას არ შეესაბამება.

ამასთან, ლატვიის საგარეო საქმეთა მინისტრის, ედგარს რინკევიჩის განცხადებით, ქვეყანა არ შეეგუება დივერსიულ საქმიანობას არც საკუთარ და არც ქვეყნის პარტნიორებისა და მოკავშირეების ტერიტორიაზე.

შეგახსენებთ, რომ ჩეხეთი 2014 წელს მომხდარ აფეთქებაში რუსეთის მოქალაქეებს ადანაშაულებს. ჩეხეთის ხელისუფლებამ 19 რუსი დიპლომატი ქვეყნიდან გააძევა. ამის საპასუხოდ კი, რუსეთმა ქვეყნიდან 20 ჩეხი დიპლომატი გააძევა.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,