სოსო ცისკარიშვილი: ჭიკაიძის თანამდებობიდან გამათავისუფლებლებს, ალბათ, სინდისის ქენჯნა გააჩნდათ

2015-07-20 12:55:50, 365 ნახვა

პოლიტიკა

"დამოუკიდებელ ექსპერტთა კლუბის პრეზიდენტის" სოსო ცისკარიშვილის შეფასებით, კრიზისების მართვის საბჭოს მდივნის მოადგილედ დანიშვნა, ალექსანდრე ჭიკაიძისთვის ვერავითარი კარიერული წარმატების მიმანიშნებელი ვერ იქნება.

როგორც ცისკარიშვილმა "ექსპრესნიუსს" განუცადა, ალექსანდრე ჭიკაიძე უსამართლოდ გაათავისუფლეს და, შესაძლოა, თავიანთი დანიშნული კადრის მოშორების გამო, უხერხულობას გრძნობენ.

კითხვაზე-იქნებოდა თუ არა ალექსანდრე ჭიკაიძის სურვილი ხსენებულ თანამდებობაზე დანიშნულიყო, ცისკარიშვილმა განაცხადა, რომ მას არჩევანის საშუალება არ ექნებოდა, თანაც, მისივე განმარტებით, აშკარაა, რომ ხელისუფლებას სანდო კადრების დეფიციტი აქვს.

"ჭიკაიძე მსხვერპლთშეწირვის ტრადიციულ ქმედებას შეეწირა. მას სხვაზე უარესად არ უმუშავია და მისი დაბრუნება რაიმე მოულოდნელობად შეიძლება არც აღვიქვათ. უბრალოდ, თანამდებობა ამ საბჭოს მდივნის მოადგილისა, არც თუ საამაყო უნდა იყოს ამ ახალგაზრდა ადამიანისთვის. მითუმეტეს როდესაც ვიცით ჯერ კიდევ ვის უკავია თავად მდივნის თანამდებობა. არჩევანის საშუალება მას ნამდვილად არ ექნებოდა, მაგრამ თუ სხვა კუთხით შევხედავთ ამ დანიშვნის ფაქტს, ისიც შეიძლება ვივაურადოთ, რომ სანდო კადრების დეფიციტი ჩვენი ხელისუფლებისთვის უკვე თვალსაჩინოა. კრიზისების მართვის საბჭოს მდივნის მოადგილედ დანიშვნა, ვერაფერი კარიერული წარმატების მიმანიშნებელი ვერ იქნება. უბრალოდ, ალბათ სინდისის ქენჯნა გააჩნდათ თანამდებობიდან მის გამათავისუფლებლებს და მისი გულწრფელობა, სურვილი სიკეთის შექმნისა, გაახსენდათ და ერთი მოტივი ცალკე აღებული არ უნდა განიხილებოდეს ასეთი გადაწყვეტილების მიღებისას. ერთი, რომ უნდა გრძნობდნენ გარკვეულ უხერხულობას, რომ თავისი დანიშნული კადრი ისე მოიშორეს, აიძულეს დაეწერა მას თავად განცხადება გათავისუფლების თხოვნით",-განაცხადა სოსო ცისკარიშვილმა.

ცნობისთვის, შინაგან საქმეთა ყოფილი მინისტრი ალექსანდრე ჭიკაიძე სახელმწიფო უსაფრთხოებისა და კრიზისების მართვის საბჭოს მდივნის, მინდია ჯანელიძის, მოადგილედ დაინიშნა. ალექსანდრე ჭიკაიძეს შინაგან საქმეთა მინისტრის თანამდებობა 2013 წლის 20 ნოემბრიდან 2015 წლის 23 იანვრამდე ეკავა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან