მდინარაძე: ვადამდელი საპარლამენტო არჩევნები „ნაცმოძრაობის“ ოცნებაა, რომელიც ქვეყნის ოცნებებს არ ემთხვევა

2019-04-30 14:06:05, 1635 ნახვა

კომენტარი

"ეს "ნაციონალური მოძრაობის" ოცნებაა და მათი ოცნებები ქვეყნის ოცნებებს და ქვეყნის განვითარების გეგმებს არ უკავშირდება", - ასე გამოეხმაურა ფრაქცია "ქართული ოცნების" თავმჯდომარე მამუკა მდინარაძე გავრცელებულ ინფორმაციას, რომლის მიხედვითაც, ბიძინა ივანიშვილმა ვადამდელი საპარლამენტო არჩევნების ჩატარების შესახებ გადაწყვეტილება მიიღო.

როგორც მდინარაძემ განმარტა, აღნიშნული ინფორმაცია არასერიოზულია და ოპოზიცია დემაგოგიას ეწევა.

"ვადამდელ საპარლამენტო არჩევნებთან დაკავშირებით მე არ გამომივა სერიოზული კომენტარის გაკეთება. ეს ყველაფერი დაკავშირებულია ენმ-ის საერთო მესიჯბოქსთან, რომ რაღაცა ქაოსი ხდება, რაღაცა უბედურება ხდება. ბოლო დროს სასამართლოსთან დაკავშირებული მოვლენებით, მათი მოქმედებები დაკავშირებული იყო ხელისუფლების ერთ-ერთი შტოს გაჩერებისკენ. ყველანაირად ცდილობენ შექმნან სიტუაცია, რაც რეალობასთან კავშირში ნამდვილად არ არის. ეს რაღაც პოლიტიკური ხრიკია, რომ ჯერ დაიწყონ ვადამდელ საპარლამენტო არჩევნებზე საუბარი და მერე თქვან რომ ეს აწყობთ მათ კი არა, არამედ "ქართულ ოცნებას". ეს არის დემაგოგიის ნაწილი, რომელიც მხოლოდ "ნაციონალური მოძრაობის" წევრებს შეუძლიათ", - აღნიშნა მამუკა მდინარაძემ.

Patreon P მხარი დაუჭირე "ექსპრესნიუსს" →

ავტორი: ელენე გვიმრაძე, ექსპრესნიუსის რეპორტიორი 2018 წლიდან