საკრებულოს სხდომა ხმაურის ფონზე წარიმართა

2015-06-16 15:55:18, 387 ნახვა

საზოგადოება

დედაქალაქის საკრებულოში საგანგებო სხდომა გაიმართა, სადაც მუნიციპალური განვითარების ფონდიდან სტიქიის შედეგად დაზიანებული ქუჩების რეაბილიტაციისთვის 18 მილიონი ლარის გამოყოფას უყარეს კენჭი.
სხდომის დასაწყისში დეპუტატებმა სტიქიის შედეგად დაღუპულთა ხსოვნას წუთიერი დუმილით პატივი მიაგეს.
საკრებულოში 18 მილიონი ლარის სესხის გამოყოფის საკითხი მერიის საფინანსო საქალაქო სამსახურის უფროსმა ლევან თევზაიამ გაიტანა.
ამ საკითხს სხდომაზე მცირე კამათი მოჰყვა.
როგორც სხდომაზე საკრებულოს უმცირესობის წევრმა ირაკლი აბესაძემ განაცხადა, მერიას თანხის გამოყოფა მანამდე მოითხოვა, სანამ სტიქიური მოვლენა მოხდებოდა.
მას ჰქონდა კითხვები, თუ რისთვის იყო ეს თანხა გათვალისწინებული.
საკრებულოს საფინანსო-საბიუჯეტო კომიტეტის წევრის ჯაბა სამუშიას განმარტებით, ეს თანხა გამოყოფილი იყო თბილისის სხვადასხვა ქუჩებზე ინფრასტრუქტურის მოწესრიგებისთვის.
ირაკლი აბესაძემ თევზაიას მიმართა კონკრეტულად ერთი ქუჩა მაინც დაესახელებინა, რომელიც რეაბილიტაციისთვის იყო გათვალისწინებული.
თუმცა, თევზაიამ პასუხის გაცემა ვერ შეძლო, რის შემდეგაც სამუშაიამ განაცხადა, რომ მანამდე 40 ქუჩის რეაბილიტაცია იყო დაგეგმილი და ამ თანხის მიზნობრიობა არ შეცვლილა, უბრალოდ შეცვალა ქუჩების დასახელება, რომლებიც სტიქიის შედეგად დაზიანდნენ.
სამუშიამ ოპონენტები პოლიტიკური სპეკულაციებში დაადანაშულა.
ჯაბა სამუშიამ განაცხადა, რომ აღნიშული 18 მილიონი ლარი ქუჩებზე ინფრასტიქტურის მოწესრიგებას მოხმარდება, რომელთა შორის სტიქიის შედეგად დაზიანებული ქუჩებია.
საკრებულოს უმცირესობამ განაცხადა, რომ დღეს ამომწურავი პასუხი ვერ მიიღეს, თუმცა აღნიშნული საკითხის დამტკიცებას მხარი დაუჭირეს.
საკრებულოს დეპუტატებმა მერიას მუნიციპალური განვითარების ფონდიდან 18 მილიონი ლარის გამოყოფაზე თანხმობა მისცა.