ტოლერანტობის და მრავალფეროვნების ინსტიტუტი (TDI) ვიტალი საფაროვის მკვლელობის საქმესთან დაკავშირებით განცხადებას ავრცელებს.

ორგანიზაცია მიმართავს შინაგან საქმეთა სამინისტროს, მკაცრი, დროული და ეფექტიანი რეაგირება მოახდინოს დანაშაულზე, რომელიც მათი თქმით, სავარაუდოდ, ნეონაცისტური ჯგუფის წევრების მიერ არის ჩადენილი.

„30 სექტემბერს, გამთენიისას, თბილისის ცენტრში, სავარაუდოდ ქსენოფობიურ ნიადაგზე,  მოკლეს საქართველოს მოქალაქე, 25 წლის ვიტალი საფაროვი.

ვიტალი საფაროვის საქმე განსაკუთრებით საყურადღებოა იმ კუთხითაც, რომ იგი შესაძლოა იყოს ნეონაცისტური ჯგუფის წარმომადგენლების მიერ რასობრივი შეუწყნარებლობის საფუძველზე ჩადენილი პირველი მკვლელობა.

შინაგან საქმეთა სამინისტრო საქმეს იძიებს სისხლის სამართლის კოდექსის 108-ე მუხლით, რაც განზრახ მკვლელობას გულისხმობს. იმის გათვალისწინებით, რომ მკვლელობა სავარაუდოდ ჩადენილია ჯგუფურად, განსაკუთრებული სისასტიკით, რასობრივი, რელიგიური, ეროვნული ან ეთნიკური შეუწყნარებლობის მოტივით, მიგვაჩნია, რომ საქმე უნდა დაკვალიფიცირდეს 109-ე მუხლით - განზრახ მკვლელობა დამამძიმებელ გარემოებებში.

მოვუწოდებთ საქართველოს შინაგან საქმეთა სამინისტროს, აწარმოოს ყოველმხრივი და ობიექტური გამოძიება, საქმეს დაუყოვნებლივ მიანიჭოს სწორი კვალიფიკაცია, საქმის  მნიშვნელობიდან გამომდინარე, საზოგადოებას წარუდგინოს გამოძიების დეტალები, დანაშაულის მოტივი და დადასტურების შემთხვევაში, გამოკვეთოს დამამძიმებელი გარემოებები, მათ შორის რასობრივი, რელიგიური, ეროვნული და/ან ეთნიკური შეუწყნარებლობის მოტივი.

ბოლო წლების განმავლობაში, ნეოფაშისტური და ულტრანაციონალისტური ჯგუფები საჯარო სივრცეში ხშირად ჩნდებიან და თავს ესხმიან კონკრეტული წარმოშობის, ეროვნებისა თუ იდენტობის მქონე ადამიანებს.

TDI-მ უკანასკნელად, ე.წ. “საქართველოს დარაჯების” საქმეზე, შსს-ს 1 თვის წინ, 14 სექტემბერს მიმართა საჯაროდ და მოუწოდა მყისიერი რეაგირება მოეხდინა სიძულვილით მოტივირებულ ქმედებებზე. - “ყოველგვარი უმოქმედობა წაახალისებს ექსტრემისტულ ჯგუფებს რელიგიური/ეთნიკური/რასობრივი შეუწყნარებლობით მოტივირებული დანაშაულისკენ“, - აღნიშნულია TDI-ს განცხადებაში.

გავრცელებული ინფორმაციით, კონფლიქტი თბილისში, თავისუფლების მოედანზე მდებარე ერთ-ერთ ბარში დაიწყო და შემდეგ დიუმას ქუჩაზე გაგრძელდა. ვიტალი საფაროვი ცივი იარაღით მიყენებული მრავლობითი ჭრილობების შედეგად, საავადმყოფოში მიყვანამდე გარდაიცვალა. გარდა ამისა, დაჭრილია საფაროვის მეგობარიც, რომელიც საავადმყოფოში გადაიყვანეს.

ვიტალი საფაროვი ეთნიკური უმცირესობების ინტეგრაციის საკითხებზე ჩართულობისა და განვითარების ცენტრში მუშაობდა.

ავტორი: ,

სოციალური ქსელები

მეუფე საბა - მეუფე შიოს 50% +1 ხმა უკვე აქვს, თუმცა, ეს იმას არ ნიშნავს, რომ გაფართოებული კრების ჩატარებას მნიშვნელობა არ აქვს

მიტროპოლიტმა ისაიამ სინოდის სხდომაზე პატრიარქობის კანდიდატად საკუთარი თავის დასახელების სურვილი გამოთქვა, თუმცა სინოდმა მხარი არ დაუჭირა

მარნეულში 10 წლის ბავშვს მანქანა დაეჯახა, იგი გარდაიცვალა, კლინიკასთან დაძაბულეობა იყო

ლევან სუთიძე - მეუფე შიომ მხარდაჭერა უკვე კამპანიის დროს მოიპოვა