2018-08-18 11:24:34, 1436 ნახვა

---

იზორია: გიორგი ანწუხელიძე ჩვენი ეპოქის გმირია, რომელმაც კიდევ ერთხელ გააძლიერა ისტორიული მეხსიერება და ვალდებულება

დღეს, საქართველოს ეროვნული გმირის, გიორგი ანწუხელიძის დაბადების დღეა.

აღნიშნულთან დაკავშირებით მუხათგვერდის ძმათა სასაფლაოზე დილიდან ანწუხელიძის ოჯახის წევრები, მეგობრები და თანამებრძოლები იმყოფებიან.

ადგილზე იმყოფებოდა თავდაცვის მინისტრი ლევან იზორია, რომელმაც ანწუხელიძის საფლავი ყვავილებით შეამკო და აღნიშნა, რომ იგი ჩვენი ეპოქის გმირია.

„დღეს გიორგი ანწუხელიძეს 34 წელი შეუსრულდებოდა. გიორგი ჩვენი ეპოქის გმირია, რომელმაც თავისი თავგანწირვით კიდევ ერთხელ გააძლიერა ჩვენი ისტორიული მეხსიერება და ვალდებულება - დაიცვა შენი ქვეყნის თავისუფლება და ღირსება. დღეს ჩვენი ყველას ვალია, მაქსიმუმი გავაკეთოთ იმისთვის, რომ გავაძლიეროთ ჩვენი ქვეყანა, მათ შორის თავდაცვის სფეროში“, - განაცხადა იზორიამ.

შეგახსენებთ, რომ საქართველოს შეიარაღებული ძალების უმცროსი სერჟანტი გიორგი ანწუხელიძე,  2008 წლის 9 აგვისტოს, რუსეთ-საქართველოს ომის დროს, ერთ-ერთი შეტაკების შემდეგ დაატყვევეს. წამებისა და დაკითხვის შემდეგ კი, ცხინვალის მე-5 სკოლასთან, ცემით მოკლეს. 2008 წლის ნოემბრამდე უგზო-უკვლოდ დაკარგულად ითვლებოდა, მაგრამ  რაც ცხინვალიდან ათი ქართველის ცხედარი გადმოასვენეს, გენეტიკური ექსპერტიზით დადგინდა, რომ ერთ-ერთი მათგანი გიორგი ანწუხელიძე იყო. დაკრძალულია თბილისში, მუხათგვერდის ძმათა სასაფლაოზე.

---

ავტორი: ,

---

დღის თემა

მთავარი თემა

ინტერვიუ - ექსკლუზივი