გენდერული თანასწორობის საბჭოს თავმჯდომარემ თამარ ჩუგოშვილმა, სამოქალაქო საზოგადოებას, აღმასრულებელი ხელისუფლების წარმომადგენლებს და საერთაშორისო დონორ ორგანიზაციებს, გენდერული თანასწორობის ახალი კონცეფციის პროექტი წარუდგინა.

თამარ ჩუგოშვილის განცხადებით, აღნიშნული პროექტი არის ქალთა საკითხებში და გენდერული თანასწორობის საკითხებში ძირითადი პოლიტიკის განმსაზღვრელი დოკუმენტი მთლიანად ქვეყნისთვის და არა მარტო საქართველოს პარლამენტისთვის. 

მისივე თქმით, ამ დოკუმენტს მხარი დაუჭირეს გენდერული თანასწორობის საბჭოს წევრებმა როგორც საპარლამენტო უმრავლესობიდან, ასევე ყველა ოპოზიციური პარტიიდან, 

„გვინდოდა, რომ პროექტი ფართო საზოგადოებისთვისაც გაგვეცნო, ყველა დაინტერესებული პირისთვის მიგვეცა შესაძლებლობა გაცნობოდა დოკუმენტს და თუ რაიმე შენიშვნები იქნება გამოთქმული, გენდერული თანასწორობის საბჭო, რა თქმა უნდა, იმსჯელებს ამ შენიშვნებზე", - განაცხადა თამარ ჩუგოშვილმა.

პარლამენტის თავმჯდომარის პირველმა მოადგილემ სახელმწიფო კონცეფციის ძირითად ღირებულებებზე და პრინციპებზე, მთავარ მიმართულებებზე და განხორციელების მექანიზმებზე ისაუბრა. 

კონცეფციის ძირითადი მიმართულებებია დისკრიმინაციის სფერო, ძალადობასთან ბრძოლის საკითხები, მშვიდობა და უსაფრთხოება, ცნობიერების ამაღლება და განათლება, პოლიტიკური სფერო, სოციალურ-ეკონომიკური სფერო, ჯანდაცვა, კულტურა და სპორტი. 

პარლამენტი სახელმწიფო კონცეფციას დადგენილების საფუძველზე დაამტკიცებს და მისი გადახედვა შვიდ წელიწადში ერთხელ მოხდება. თამარ ჩუგოშვილის განმარტებით, შვიდი წელი შერჩეული იქნა იმ მიზნით, რომ ამ დოკუმენტის გადასინჯვის პროცესი აცდენილიყო პოლიტიკურ ციკლს. 

„ჩვენ ვფიქრობთ, რომ ამ დოკუმენტის ცვლილება პოლიტიკურ ციკლს არ უნდა ემთხვეოდეს იმიტომ, რომ მიუხედავად იმისა, რომელი პოლიტიკური ძალაა დომინანტი საქართველოს პარლამენტში, ეს თემები მაინც თანაბრად მნიშვნელოვანი და აქტუალურია" , - აღნიშნა ჩუგოშვილმა.

გენდერული თანასწორობის პირველი კონცეფცია 2006 წელს დამტკიცდა და მას შემდეგ აღარ გადასინჯულა. 

დღევანდელ კონფერენციაზე ასევე წარმოდგენილი იყო გენდერული თანასწორობის საბჭოს 2017 წლის სამოქმედო გეგმის შესრულების ანგარიში და 2018-2020 წლების სამოქმედო გეგმა, რომელიც განსაზღვრავს საქართველოს პარლამენტის პრიორიტეტებს გენდერული თანასწორობის მიღწევის საკითხებში.

თამარ ჩუგოშვილმა აღნიშნა, რომ გენდერული თანასწორობის საბჭოსთვის, გასული წელი საკმაოდ აქტიური წელი იყო.

„გადაჭარბებული არ იქნება თუ ვიტყვით, რომ წინა წლებთან შედარებით გასული წელი იყო ძალიან აქტიური. ჩვენ მივიღეთ მნიშვნელოვანი საკანონმდებლო ცვლილებები, კერძოდ, მოვახდინეთ სტამბოლის კონვენციის რატიფიცირება და განვახორციელეთ შესაბამისი გამომდინარე საკანონმდებლო ცვლილებები. გასულ წელს, პირველად საქართველოს პარლამენტში, მოხდა სხვადასხვა საკანონმდებლო აქტების გენდერული ზეგავლენის შეფასება, ასევე ბევრი შეხვედრა გაიმართა მოსახლეობასთან ცნობიერების ამაღლების კუთხით", - აღნიშნა პარლამენტის თავმჯდომარის პირველმა მოადგილემ. 

მან პარტნიორ ორგანიზაციებს დახმარებისთვის და მხარდაჭერისთვის მადლობა გადაუხადა.

„მათი მხარდაჭერის გარეშე გაგვიჭირდებოდა იმ შედეგების მიღწევა, რომელიც შარშან გვქონდა. ჩვენ მათი მხარდაჭერის და დახმარების იმედი გვაქვს წელსაც სამოქმედო გეგმის განხორციელების პროცესში", - განაცხადა ჩუგოშვილმა. 

2018-2020 წლების სამოქმედო გეგმის მთავარი ამოცანებია სახელმწიფო პოლიტიკის ძირითადი მიმართულებების განსაზღვრა, გენდერული თანასწორობის სახელმწიფო მექანიზმის დახვეწა, გენდერული თანასწორობის სფეროში საკანონმდებლო ბაზის შექმნა და განვითარება, გენდერული თანასწორობის უზრუნველყოფისათვის განხორციელებული ღონისძიებების მონიტორინგი და რეკომენდაციების შემუშავება, გენდერული თანასწორობის საბჭოს ინსტიტუციური გაძლიერება და ცნობიერების ამაღლება.

ავტორი: ,

სოციალური ქსელები

ზვიად მაისაშვილი: ორივე სპეცრაზმელმა აღიარა დანაშაული, ბოდიში მოიხადეს

ზურაბიშვილმა ევროკავშირის ელჩს დიუშენის მქონე ბავშვების დახმარების თხოვნით მიმართა

ევროპის დღესთან დაკავშირებით ქართული ახალგაზრდული ორგანიზაციები ევროკავშირის ინსტიტუტების ლიდერებს ღია წერილით მიმართავენ

პეტერ მადიარი უნგრეთის პრემიერი ოფიციალურად გახდა