პარლამენტის იურიდიულ საკითხთა კომიტეტის თავმჯდომარის ეკა ბესელიას განცხადებით, ღია გამოკითხვის ნებისმიერი ფორმა მისთვის მისაღებია და მოსწონს. თუმცა, ბესელიას თქმით, გამოკითხვის ორი პირდაპირი ფორმის ერთდროულად გამოყენება შეუძლებელია. კერძოდ, ბესელიამ ოპოზიციონერი დეპუტატის კითხვაზე საპასუხოდ, პარლამენტის რიგგარეშე სხდომაზე აღნიშნა, რომ კონსტიტუციური ცვლილებების საყოველთაო-სახალხო განხილვის პარალელურად, განხილვის სხვა ფორმის გამოყენება  ფიზიკურად შეუძლებელია.

„არასოდეს არც ღია და არც დახურულ ფორმატში არ მითქვამს, რომ ცუდია რომელიმე გამოკითხვის ფორმა და ცუდია პლებისციტით თუ ვეკითხებით მოქალაქეებს, რას ფიქრობენ ისინი. მომწონს ნებისმიერი საჯარო განხილვა, მაგრამ შეუძლებელია გამოკითხვის ორი პირდაპირი ფორმა გამოიყენო ერთდროულად. კონსტიტუციურ განხილვაზე, კონსტიტუცია ამბობს, რომ საერთო-სახალხო განხილვა, ეს არის გამოკითხვის პირდაპირი ფორმა, და ამბობს, რომ ეს არის ის აუცილებელი წესი, რომელიც უნდა გამოიყენო. რასაც თქვენ ამბობდით, რომ საერთო-სახალხო განხილვა მიმდინარეობს და მოდით, პარალელურ რეჟიმში გამოიყენოთ განხილვის ეს ფორმა, მაშინ ვამბობდი, რომ ორივე ამ ფორმის გამოყენება, უბრალოდ ფიზიკურად შეუძლებელია. პოლიტიკური პროცესისთვისაც რთულია. მე რომც ვფიქრობდე ისე დამახინჯებულად, როგორც ეს ვიღაცას ჰგონია, რომ ცუდია გამოკითხვის ეს ფორმა, არც ვიტყვი ამას საჯაროდ“,-განაცხადა ეკა ბესელიამ.

დეპუტატის განმარტებით, მას ღია გამოკითხვის ნებისმიერი ფორმა მოსწონს და სწორედ ამიტომ თქვა,  რომ კონსტიტუციური მონარქიის თემა განხილვად ღირს და მასთან დაკავშირებით გადაწყვეტილება მოსახლეობამ უნდა მიიღოს:

„ამიტომაც ვთქვი კონსტიტუციურ მონარქიაზე, რომელზე ქილიკიც არის უბრალოდ დიდი უკულტურობა და არასერიოზულობა. ვისაც უნდა გააგრძელოს ეს ქილიკი. მე არ ვფიქრობ, რომ ეს საქილიკო თემაა. მიმაჩნია, რომ ამ თემაზე როგორი განსხვავებული და პოლარიზებულიც არ უნდა იყოს აზრები, ის მსჯელობად, განსჯად, დებატებად, განხილვად, დისკუსიებად ღირს და რაც მთავარია, ეს მოსახლეობამ უნდა გადაწყვიტოს, რადგან ასეთი ტიპის ცვლილება, რომელიც ცვლის პოლიტიკურ სისტემას და მთლიანად მოდელს, დიახ, ხალხმა უნდა გადაწყვიტოს“,-განაცხადა ეკა ბესელიამ.

შეგახსენებთ, საკვირაო ქადაგებისას სრულიად საქართველოს კათოლიკოს-პატრიარქმა ილია მეორემ ბრძანა, რომ კონსტიტუციურ მონარქიას ქვეყანაში სიმშვიდე შემოაქვს, რასაც მოგვიანებით ბრიფინგზე პარლამენტის თავმჯდომარეც დაეთანხმა. ირაკლი კობახიძე და იურიდიულ საკითხთა კომიტეტის თავმჯდომარე ეკა ბესელია უწმინდესს შეხვდნენ კიდეც. მედიასთან  შეხვედრის დეტალებზე არ უსაუბრიათ, მხოლოდ აღნიშნეს, რომ ილია მეორესთან  ზოგადი საუბარი ჰქონდათ, მათ შორის კონსტიტუციურ მონარქიაზეც.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

„თეგეტამ“ რუსთავის ჭალის ტყის აღდგენისთვის გამწვანების აქცია გამართა

საპატრიარქომ იობის განათლება აღიარა და მას შესაბამისი ხარისხი მიანიჭა

აპრილში „ექსპრესნიუსი“ 1.7 მილიონჯერ წაიკითხეს, სოციალურ ქსელებში, ახალ ამბებს 11 მილიონი ადამიანი გაეცნო

რუსეთის ტერიტორიის მეოთხედი და მოსახლეობის 70% უკრაინული დრონების მოქმედების რადიუსში იმყოფება