აჭარის მთავრობა 59 ეკომიგრანტ ოჯახზე კომპენსაციას გასცემს

2017-05-18 18:10:08, 1642 ნახვა

საზოგადოება

აჭარის მთავრობა თხილვანაში მუდმივად მცხოვრებ 59 ეკომიგრანტ ოჯახს 1 475 000 ლარით, ხოლო 2 ოჯახს ბინით აკმაყოფილებს.

აჭარის ავტონომიურ რესპუბლიკაში სტიქიური მოვლენების შედეგად მიყენებული ზარალის სალიკვიდაციო შერეული სამთავრობო კომისიის დღევანდელ სხდომაზე ხულოს მუნიციპალიტეტის სოფელ თხილვანაში მუდმივად მცხოვრები 32 ეკომიგრანტი ოჯახის საკითხი განიხილა.

აღნიშნულ ოჯახებს, საცხოვრებელი ფართებით უზრუნველყოფის მიზნით, აჭარის მთავრობის სარეზერვო ფონდიდან 800 000 ლარი გამოიყოფა. კომისიის სარეკომენდაციო წერილი დასამტკიცებლად აჭარის მთავრობის თავმჯდომარეს უახლოეს დღეებში გადაეგზავნება.

სამთავრობო კომისიამ მაისის დასაწყისში თხილვანაში მცხოვრები 27 ეკომიგრანტი ოჯახის 25 000-25 000 ლარით უზრუნველყოფის საკითხი განიხილა, ისინი თანხას უახლოეს დღეებში მიიღებენ.

ჯამში, სოფელ თხილვანაში მცხოვრებ 59 ეკომიგრანტ ოჯახს 1 475 000 ლარი გამოეყოფა. 2 ეკომიგრანტი ოჯახის ბინებით დაკმაყოფილების საკითხი ხულოს სოციალურ სახლში განიხილება.

სოფელ თხილვანაში მეწყერული პროცესები მიმდინარე წლის დასაწყისში გააქტიურდა. სტიქიამ საფრთხე ათობით ოჯახს შეუქმნა.

კომისიამ სხდომაზე, ასევე ხულოს მუნიციპალიტეტში სტიქიის შედეგად დაზარალებული საცხოვრებელი სახლების აღდგენა-გამაგრებას დაქვემდებარებული 3 ოჯახის და ადგილმონაცვლეობას დაქვემდებარებული 3 ოჯახის ფინანსური დახმარების გაწევის საკითხი განიხილა.

ასევე, მოხდა ხელვაჩაურის მუნიციპალიტეტის გამგეობის შუამდგომლობის განხილვა, სტიქიისა შედეგად დაზარალებული 2 და ხანძრის შედეგად დაზარალებული 1 ოჯახის ფინანსური დახმარების თაობაზე.

სტატისტიკა:

2017 წელს უსაფრთხო საცხოვრისის შესაძენად თანადაფინანსება გაიცა 25 ოჯახზე. 9 ოჯახს უსასყიდლოდ საკუთრებაში გადაეცა ბინა
2017 წელს აჭარის მთავრობის სარეზერვო ფონდიდან სტიქიითა და ხანძრით დაზარალებულ 27 ოჯახზე გაიცა - 279 022 ლარი
2016 წელს საცხოვრებლით დაკმაყოფილდა 117 ეკომიგრანტი ოჯახი. 61 ოჯახზე გაიცა ფინანსური დახმარება 698 050 ლარის ოდენობით

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან