პატიმრების შეწყალება და მოქალაქეობასთან დაკავშირებული საკითხები პრეზიდენტის დისკრეციად რჩება

2017-03-16 17:41:43, 1762 ნახვა

პოლიტიკა

პატიმრების შეწყალება და მოქალაქეობასთან დაკავშირებული საკითხები პრეზიდენტის დისკრეციად რჩება. აღნიშნული გადაწყვეტილება საკონსტიტუციო ცვლილებებზე მომუშავე თემატურმა ჯგუფმა დღევანდელ სხდომაზე მიიღო.

საპროცედურო საკითხთა და წესების კომიტეტის თავმჯდომარის გიორგი კახიანის ინფორმაციით, ჩანაწერი, რომ შეწყალების საკითხი კანონით მოწესრიგდეს, კონსტიტუციის პროექტში აღარ იქნება.

„გიდასტურებთ, სამუშაო ვარიანტში კონსტიტუციაში შედიოდა ასეთი ცვლილება, რომ კანონით განისაზღვრებოდა შეწყალების წესი, თუმცა კომისიაზე იყო ამ საკითხზე მსჯელობა. კომისიის წევრთა აბსოლუტურმა უმრავლესობამ გამოთქვა მოსაზრება, ვინაიდან ეს არის პრეზიდენტის სრული დისკრეცია, დღესაც ეს კანონით არ წესრიგდება, არამედ პრეზიდენტის აქტით რეგულირდება, ეს დარჩეს ისე, როგორც არის მოქმედი კანონმდებლობით და საბოლოო ჯამში მივედით იმ გადაწყვეტილებამდე, რომ ჩანაწერი, რომ შეწყალების საკითხი კანონით მოწესრიგდეს, აღარ იქნება კონსტიტუციის პროექტში.

რაც შეეხება მოქალაქეობასთან დაკავშირებულ საკითხებს, ესეც რჩება პრეზიდენტის დისკრეციად, ამ შემთხვევაში კონსტიტუციაში გაჩნდება დათქმა, რომ კანონით განსაზღვრული წესით, პრეზიდენტი მაგალითად ანიჭებს მოქალაქეობას, მაგრამ ის რაც კანონით არ წესრიგდება, ასეთი დათქმა კონსტიტუციის კანონის პროექტში აღარ იქნება",-აღნიშნა გიორგი კახიანმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან